IFL team hi kan hneh ang - Coach R-a

Adidas Exhibition match chu July 1, Nilaini hian RG Stadium floodlight hnuaiah ISL leh IFL player-ten an khel dawn a, ISL team enkawltu tur coach R. Lalruatfela chuan an chak tur thu Vanglaini a hrilh. Adidas hi FIFA World Cup sponsor-tute zinga mi an ni a, World Cup-a an ball pet 'trionda' hi adidas kut chhuak a ni. Tun ṭum exhibition match-ah pawh hian 'trionda' an pet dawn a, World Cup boruak a nih bawk avangin inkhel hian ngaihven a hlawh ang.

Aizawl FC coach R-a chuan, "Mizo player-te hi an intluk tlang a, ISL player-te hi IFL player-te ai chuan an professional zawk dawn a, mah se tualchhung football-ah chuan an inthlau tam lo ang. HPC Cup-ah pawh Lianzuala leh Rinzuala te pawh tualchhung player-ten an chelh thei tlat. Chutihrualin IFL player-te hi ka hrechiang a, kan hneh ngei ka ring," tiin Vanglaini a hrilh.

Kolasib tlangval R-a kaihhruaina hnuaiah Aizawl FC-in MPL hnuhnung berah game hmuhnawm an khel a, league round-ah pakhatna an ni. Tun ṭum hian Mizo player ṭha rual a enkawl dawn a, Ayush Chhetri leh K. Lalṭhathanga ten Lallianzuala Chhangte, Isak Vanlalruatfela leh Edmund Lalrindika te an chawm tur chu a hmuhnawm khawp ang.

ISL-ah hian Mizo 43 an awm a, player 18 chiah koh theih a nih avangin inlan lo tur an awm nual. Chutihrualin India international midfielder Lalengmawia Ralte (Apuia) erawh mimal harsatna avangin a inlan thei dawn lo.