Mexico vs Ecuador: Tiat leh tiat!

Naktuk zing dar 6:30-a World Cup match-ah Mexico leh Ecuador an inhmachhawn dawn a, team pahnih hi intiat tawk tak an nih avangin an inhmachhawn tur hi an lawm ve ve hial mai thei!

World Cup thlengtu zinga mi Mexico hian South Africa, South Korea leh Czech Repulic te hneh vek chungin round of 32 hi an lut a, goal ruk ngawt khungin, an lamah goal lut a awm miah lo thung.

Ecuador erawh beisei phak lo chunga, a tawpa beisei loh result thlentir a, round of 32 inpetkai an ni thung - match hmasa berah an tiahpuia ngaih Ivory Coast an ngam lo a, an hneh ngei tura ngaih Curacao chu 0-0 in an inhnehtawkpui thung!

Mahse, a hun têah Ecuador an rah a, an group stage match tawp berah Germany-in an neih ṭhat ber thawhchhuahpui mah se, 2-1 a hnehna changin round of 32 an inpetkai.

Team pahnih zinkawng a inang lo viau a, hei tak hi naktuk zing inkhel en tichâkawmtu a tling - an inan lohna erawh Mexico-in an match tawp berah player ṭha an hahdamtir thei a, Ecuador erawh theihtawp chhuaha an inlan a ngai thung.

Czech Republic laka hahdamtir Raul Jimenez pawh lo kir leh tura beisei a ni a, Wolverhampton Wanderers striker thar dah ṭhat hi Ecuador tan a pawimawh dawn - Ecuador hian Moisés Caicedo, Willian Pacho leh Piero Hincapié te an nei a, tlarhnung hi an ṭhatna a nih avangin Jimenez tan pawh a awlsam dawn lo.

Mexico tan tlarhnungah Jorge Sanchez, Cesar Montes, Johan Vasquez leh Jesus Gallardo te an rintlak ṭhin a, Ecuador-in hnehna chan an tum chuan Sunderland winger Nilson Angulo, Flamengo winger Gonzalo Plata leh Mexican club Pachuca forward Enner Valencia te chet ṭhat a ṭul ang.

Hriat tel reng ngai chu an inkhelhna tur hmun hi Mexico City Stadium a ni a, Mexico mipuiten an ram team an auh phur leh dawn avangin Ecuador tan boruak ngam sarh a ngai dawn!