Sunderland-in Xhaka hralh phal lo

Chelsea chuan Sunderland midfielder Granit Xhaka lakluh tumin dawr mah se, Black Cats hian an mifielder hi hralh tumna an neih loh thu an lo hrilh a, "Eng zat mahin leichhuah theih a ni lo," an ti!

Blues hi season tharah Xabi Alonso chuan a enkawl dawn a, Bayer Leverkusen boss hlui hian Bundesliga lama a lo hlawhtlinpui tawh player hi Stamford Bridge lamah seng luh ngei a duh.

Hei vang hian Chelsea pawhin Alonso duhna hi pawmpuiin, pound maktaduai riat nen Sunderland an dawr a, mahse, Premier League club hian kum 33 mi midfielder hi hralh an phal tlat lo.

Switzerland tana World Cup khela thang mek Xhaka hian season hmasa ṭan dawn khan Sunderland hi £17.5mtd-in a zawm a, Black Cats hian captain armband hrengtir zuiin, season duhawm tak a hmang.

Premier League kai thar club hi EPL inhamtang ringawt pawh ni se, result ṭha tia chhiarsak tur an nih laiin, pasarihna a nihpui a, kum 53 chhunga a vawi khat nana European football khel turin a kaipui.

Hei vang hian Sunderland hian tawnhriat nei ṭha midfielder hi an hnena awm chhunzawm zel turin an beisei a, club tan match 36-ah goal khat khung tawhin, assist vawi ruk a nei tawh.

Sunderland chuan June 2028 thleng an hnena cham tura contract nei Xhaka chungchangah dawr tawh lo turin Chelsea hi an hriattir nghal a, a contract neih lai chu zahsak turin an ngen nghal bawk.