Last 16 lut hmasa ber Canada

Kumin World Cup thlengtu zinga mi Canada chuan Pathianni zan khan South Africa hnehin last 16 an lut a, chak turin vanneihna an mamawh thung. Canada tan injury time-ah Stephen Eustaquio chuan an chakna goal a khung a, South Africa an hneh nan a tawk.

An inthlau lo

An match hmasa berah a thlengtu zinga mi Mexico hneh lo mah se South Africa an tho chhuak a, an match dawt leh pahnih aṭanga point li hmuin second round an lut. Canada lakah pawh Bafana Bafana (South Africa sawina) hian ball an chang hnem zawk a, an in pass hnem zawk bawk. Mahse a pawimawh ber goal an khung thei lo.

Inkhel ṭan aṭanga rei loteah Teboho Mokoena chuan Canada keeper tan hna a siam a, Bafana Bafana hian chance ṭha dang insiam an harsat. Ball chang tlem zawk mah se Reds (Canada sawina)-in chance an ngah zawk.

Jonathan David-a'n corner kick aṭanga a ball hmuh chu a pet ṭhat tawk loh avangin goal zawnah a kal lo a, Derek Cornelius chuan tibuaitu nei lo chungin goal zawnah a tauh thei lo bawk.

Tani Oluwaseyi chuan goal zawnah pet thei mah se South Africa keeper Ronwen Williams tan hna hautak a siam thei lo a, Moïse Bombito-a tauh ṭha zet chu goal line aṭangin an lo pet chhuahsak hman a ni bawk a, first half-ah goal a lut lo.

A goal har

Second half-ah pawh Canada an hlauhawm hmasa a, Oluwaseyi chuan keeper chauh a hmachhawn hnuah a pet goal thei lo a, Promise David-a'n a hun ṭha neih a chhawr ṭangkai thei lo bawk. South Africa-in hma an sawn hret a, Oswin Appollis hmangin hun ṭha nei mah se Canada keeper Maxime Crépeau fiahna chauh a ni.

Team pahihten extra time an khelh tawh mai dawna a lan laiin, hun pek belhah South Africa defender ten hmun himah ball an tauh chhuak thei lo a, Eustaquio chuan box pawn aṭangin goal kilah tak a pet lut a, hun a tawp zui nghal avangin Canada-in a vawi khat nan round of 16 an lut.

Canadian pasalṭhate

Inkhel a zawh rualin Canada coach Jesse Marsch chuan player tinte kawk kualin, "Vawiin hian Canada hnam pasalṭhate in ni a, he infiamna ngainatu leh Canadian naupang zawkte tan pasalṭha in ni reng tawh ang," a ti

Marsch hian hliam vanga World Cup khel chhunzawm thei lo tur Ismaël Koné a theihnghilh lo a, Canada 'logo' a fawh hnuah Kone hi a va kuah. Sassuolo defender hi Qatar nen an inkhelh ṭumin a ke ruh a tliak a, a chawlh chen tur a la hria loh.

Engtin zel?

Canada hi an group-ah hmahruaitu an nih theih loh avangin an hmabak chu USA-ah an khelh a ngai tawh dawn. Mahse round of 32-ah team nem pawla ngaih South Africa an hmachhawn a, vanneihna nen last 16 an lut.

The Reds hian July 4, Inrinni zan dar 10:30-ah Netherlands leh Morocco inkhela chak zawk nen quarterfinal luh an inchuh dawn a, an hmabak a ko hle. Mahse Canada tan an thiampuipa Alphonso Davies a inlan leh thei tawh a, an inringtawk sawt ang.

South Africa erawh hnehna an chan zawh loh avangin World Cup an mangṭha a ngai a, an ram chanchina a vawi khat nana knockout stage an luh avangin an thlen chin hi a hniam lo hle.