Milan coach Amorim-a'n Mount a duh

AC Milan head coach thar Ruben Amorim chuan a club hlui, Manchester United midfielder Mason Mount chu lak luh a duh a, inbiakna engmah a la awm lo bawk niin khawthlang chanchinbuten an sawi.

English midfielder Mount hian 2023 khan Man United a zawm a, khatih laia United enkawltu Erik Ten Hag-a'n pound maktaduai 55 zetin a lei chhuak. Mahse, Old Trafford-ah Mount-a'n beisei a pha lo a, season thum chhungin match 55 chauh a khel a, goal li chiah a khung bawk.

Hetihlai hian Maximiliano Allegri hmun ruak luahtu, Amorim chuan Mount hi an indintharna kawnga player pawimawh ni turin San Siro-ah seng luh a duh hle. Portuguese coach hian Old Trafford-a a awm chhung zawng khan Mount-a hi a dah sang hle a, United coach a nih hma pawh khan Mount chungchang hi hahipin a lo sawi tawh.

Kum 27 mi Mount hi Carrick-a’n United a enkawl hnua an game hnihna, Arsenal nena an inkhelh zawh khan training-naah hliam te nau a nei a, hei vang hian March thla chanve chhung a chawlh leh a ngaih phah.

Mount hian May thlaa Sunderland nena an inkhelh ṭum khan Michael Carrick-a hnuaia a game hmasa ber a khel a, inelna tawp bera Brighton nena an hmachhawn ṭum pawh khan inkhel bul ṭantu zingah a tel.

Chelsea midfielder hlui hian season hmasa tir lam khan a khel ṭha a, Sunderland, Crystal Palace leh Wolverhampton lakah goal a khungin Amorim-a'n a hmang thiam hle. Milan hian Mount manah pound maktaduai 21 bawr vel thehchhuah an huam a, mahse United-in a aia sang an chhiar a rinawm.