South Korea coach Hong a bang

World Cup knockout stage thleng zo loa an tlak hnuah, South Korea coach Hong Myung-bo chuan South Korea head coach a nihna aṭangin a bang a, an ram team a enkawl chhunzawm dawn lo.

Group stage an paltlang theih loh avangin South Korea team hian sawisel an tawk nasa a, president Lee Jae Myung chuan an chet ṭhat tawk loh chhan chu chhui chianna nei turin a phut hial.

FIFA ranking-ah 32-na ni phâk South Korea hi vawi hnih tlawmin vawi khat hnehna an chang a, pathumna ni mah se an goal difference a ṭhat loh avangin World Cup an mangṭha.

South Korea mipuite chuan kum hnih chhung lo enkawl tawhtu Hong hi an mawhhpuh nasa hle a, Thawhṭanni khan ram chhunga an fan club lian ber 'Red Devils' chuan thuchhuah siamin, Hong chu ram pum hmaah hian ṭhingṭhi a, football-a inhnamhnawih tawh lo turin an phut.

Pathianni khan Hong chuan, "Kan mipuite beisei ang result kan chhawp chhuak zo lo a, pawi ka ti takzet. National team hi chhuahsan rih dawn mah ila, Korea football hi ka thlahthlam hlen dawn tihna a ni lo. Ka thinlung takin kan ram team hi ka la thlawp reng dawn a, mipuite pawhin an thlawp leh vat ka beisei," a ti.

Head coach atan Hong an rawih khan sawiseltu a ngah tawh a, kum 2002 World Cup-a South Korea-in semifinal an thlen ṭuma an captain hlui hian, 2014 World Cup-a an ram a enkawl khan chak nei loin a tlakpui tawh. Kum 2024-a rawih nawn a nih khan mipui an thinur thar a, KFA (Korea Football Association) hotu lianten an duhsak vang niin an ngai a ni.