Russell-a hun a inherchhuak leh ta

Tun hnaia chanchin ngah tak George Russell chu Pathianni zan Austrian Grand Prix-ah pakhatna a ni a, Mercedes driver hi tun season inelna hmasa ber Australian GP hnua hnehna a chan lehna hmasa ber a ni.

Intlansiak ṭan a nih aṭangin Russell-a'n hma a hruai nghal a, a laihawlah driver dangin hmahruai zeuh mah se Russell a inthlahdah lo a, ṭha taka tlan tluan theiin phu takin pakhatna a ni.

Russell ang bawka chanchin ngah tak Max Verstappen chu pahnihna a ni a, Russell-a teammate Andrea Kimi Antonelli chu pathumnaah a thleng bawk. McLaren driver Oscar Piastri chu palina a ni a, Barcelona-Catalunya GP-a pakhatna Lewis Hamilton erawh panganaah a awm a, Lando Norris pasarihnaah daih a awm bawk.

Kum 28 mi Russell hian tun season-ah bul ṭan ṭha a, vawi hnih hnehna a channa chiah niin podium-ah ṭum li a lawm tawh bawk. Driver tam tak tan Russell-a thlen chin hi inchhuanna tham a nih laiin, a teammate Andrea Kimi Antonelli a chet ṭhat em avangin Russell hi a dinhmun a chiang lo hman hial.

Hei bakah hian Austrian GP qualifying round-ah Max Verstappen chetsual laiin 'yellow flag' phar a ni a, double flag pharchhuah leh a ni bawk. 'Double yellow flag' phar a nih chuan tlan muan a, a ṭul huna ding thei tura inrin a ngai.

British driver Russell hi Verstappen chetsual lai hian a awmna a hlat bakah, 'yellow flag' chauh an phar laiin a tlan tlang a, Austrian GP atan P1 a chang. Mi tam takin Russell hi 'double yellow flag' phar a nih laia tlan tlangah ngaiin an sawisel nasa hle. Mahse Mercedes driver hian amah sawiseltute ka a hup thung.

Vawi hnih nana a chak hnuah Russell chuan, "Hun rei tak chhung pakhatna ni tawh lo ang mai hian ka inhria. Tun hnaiah track chhung leh pawnah ka tluang lo em em a, engkim hi keimah kalh zawngin a kal vek niin ka hre ṭhin. Mahse team ṭha tak ka nei a, anni zarah intlasiak hnuhnung pahnihah ka che ṭha a, anni ang team ka nei hi ka lawmin ka chhuang takzet a ni," a ti.