Team hmuhnawm Japan pet chhuaktu Brazil

World Cup boruak a sosang tawlh tawlh - Thawhṭanni zan khan champion beisei zinga mi Brazil chuan Asian team ṭha Japan chu round of 32 aṭangin an pet chhuak a, Carlo Ancelotti naute hian 2-1 in hnehna an chang.

Japan hian Kaishu Sano hmanga goal hmahruai khungin, minute 29-naah hma an hruai. Samurai Blue hi tlarhnung lamah an bet chhunzawm a, Brazil meuh pawhin khelh harsa an ti hle.

Mahse, coach ropui Carlo Ancelotti neitu an ni miau a, Brazil-in second half-ah game an thlak danglam. Manchester United chhuahsantu mifielder Casemiro chuan goal hmahruai a khung a, hun pek belhah Gabriel Martinelli chuan chakna goal a khung zui.

Japan tan si phurh sut turin hun a awm tawh lo a, a zawna a vawi thum nan, World Cup knockout stage-ah an la tlawm ta vek - Japan tan a na a, mittui nen World Cup chu an thlah leh ta phawt.

A bul ṭanna

Inkhel ṭantir lamah Brazil ai mahin Japan an hmuhnawm zawk a, Hajime Moriyasu-a kaihhruai team hian Brazil angin mimal tak pawha player langsar kawl hnem lo mah se, team game an khelh ṭhin avangin an hmuhnawm hle.

Minute 29-naah Japan hian goal an khung ta nge nge - Brazil fullback Danilo-a ball pass sual chu Sano chuan lo chang fuhin, Mainz 05 defensive midfielder hian chak taka a tlanpui hnuah ṭha zetin goal-ah a chantir.

Danilo a fimkhur tawk lo a, Sano umtu Casemiro-a'n a tih tur a ti lo a, keeper Alisson tan chuan dan harsa a ni tawh - Sano tan Japan jersey ha chunga a goal hmasa ber a ni zui a, a hre reng tawh dawn.

Japan-in 1-0 a hma an hruai hnuah Brazil chu hlauhawm sawt tura beisei an ni a, mahse, Carlo Ancelotti naute hian beisei angin Japan an rum ṭhaih thei lo a, Vinicius Jr meuh pawh a reh tlat!

King Carlo thluak!

First half-ah Brazil inkhel a nung tawk lo a, Japan tan chance a ṭha zawk - Ancelotti-a'n hei hi hmu thiamin, hliam vanga lakchhuah Lucas Paqueta aiah forward Endrick a luhtir mauh mai!

King Carlo-a'n forward hmangin midfielder a thlak a, goal khung a tum tih a chiang. Endrick luh hnuah a tira 4-1-2-3 anga khel Brazil chu 4-2-4 ah an kir a, a laia talbuai Vinicius leh Rayan te mual sirah an inpawt parh.

Hei hian tlarhnunga player panga remtu Japan a tibuai sawt a, Brazil an hmuhnawm sawt - Selecao hian ball an cross mawlh mawlh a, Japan an talbuai ṭan avangin, "Si phurh an sut ang em?" tih ai chuan, "Engtikah nge an sut ang?" tih chu zawhna zawk a ni.

Minute 56-naah Brazil-in kan zawhna chhanna min pe ta nge nge a, Gabriel Magalhães siamsak chu Casemiro chuan Premier League lamna a tihfo angin a tauh lut a, Selecao-in an si phurh an sut.

Laipui a puak

Brazil-in an si phurh an sut hi chuan an chak a rinawm tawh a, Japan an nawr na tawlh tawlh a ni ber - si phurh an sut aṭanga minute thum hnu lawkah Vini-a magic kan hmu.

Real Madrid forward hian amah vengtu Takehiro Tomiyasu chu duhthala a lam khum hnuah, Japan box chhungah mawi zetin ball a la lut a, defender dang a bum leh hnuah goal-ah a pet.

Mahse, Japan tan keeper Zion Suzuki chuan Vini-a shot hi a lo khawih per a, post a per zui. Japan an vannei takzet. Brazil-in an nawr chhunzawm a, hun pek belhah an khung ta nge nge.

Ao Tanaka-a'n goal hnaih takah ball hlohin, Bruno Guimaraes chuan Martinelli tana duhthusamin a siamsak zui. Arsenal forward-in goal-ah a chantir a, Brazil-in 2-1 in hnehna an chang a, round of 32-ah Ivory Coast leh Norway inkhela chak zawk an hmachhawn ang.