Kan fimkhur a ngai - US Captain

United States captain Tim Ream chuan World Cup round of 32-a Bosnia & Herzegovina nen an inkhelh hunah an fimkhur a ngaih tur thu a sawi a, Bosnia chu an dah nau ngawt a nih chuan an chetsual tur thu a sawi.

USA hian naktuk zing dar 5:30-ah Bosnia an hmachhawn dawn a, World Cup thlengtu ram tan top team tum loa Bosnia hmachhawn hi vanneihna a ni thei. Mahse, Team Ream a fimkhur.

Kum 38 mi defender chuan, "Team ṭha tak an ni a, tharum an ngah em em bawk. Round of 32 hi vanneih vang ngawta lut an ni bik lo," a ti a, last 16 lut lo thei an nih ve thu a sawi.

Ream chuan, "Bosnia hian playoff paltlangin Italy meuh an pet chhuak a, an thiam tawk tih a chiang. Chuvang chuan inthlahdah loa kan hmachhawn a ngai dawn a ni," a ti a, chak ngei tuma Bosnia an hmachhawn tur thu a sawi.

USA hi 'golden generation' tih hialin tuna an squad hi sawi a ni a, an group stage match thumah vawi hnih chakin, an tlin chian tawh hnuah 3-2 in Turkey an ngam lo.

US hian Juventus midfielder Weston McKennie, Bournemouth midfielder Tyler Adams, PSV Eindhoven fullback Sergiño Dest, Fulham fullback Antonee Robinson leh AC Milan forward Christian Pulisic te ho an nei a, tawh an khirh dawn.

Bosnia and Herzegovina hian Switzerland chu 4-1 a ngam loin mualpho mah se, Canada inhnehtawkpuiin, Qatar 3-1 in an hneh bawk a, tawnhriat nei ṭha Edin Džeko-a'n a la ho thei bawk.

Kum 18 mi Kerim Alajbegović hi thlir bik hlawh tur a ni leh dawn a, US pawhin Red Bull Salzburg forward hi ven bika an neih a fuh dawn - kum 21 mi Esmir Bajraktarević pawh sawi hmaih a thiang lo.

PSV Eindhoven winger hi USA-a piang niin, age level-ah US tan a inlan a, senior team tan match khat a khel hman bawk. Mahse, kum 2024-ah a ram thlakin, Bosnia tan a inlan zui a, US-ah a hming chher a tum dawn.