City-in Maresca an la lut

Manchester City chuan Chelsea coach hlui Enzo Maresca chu Pep Guardiola thlak tura an lakluh thu an puang a, "Italian manager hian kum thum atan contract a ziak a ni," an ti.

Maresca hian kum 2029 nipui thleng City hi a enkawl dawn tihna a ni a, Pep-a hnuaiah assistant coach a lo nih tawh ṭhin avangin Etihad Stadium-ah hian a mikhual hran lo.

Kum 46 mi Maresca hian club enkawl nei tawh lo mah se, Chelsea nen an inṭhen khan inhriatthiam tawnnaa inṭhen anga sawi ni mah se, amah ngeiin banna a thehluh thu tunah chuan a sawi.

Hei vang hian Maresca hian Chelsea lakah sum a chawi zawk nia sawi a ni a, City hian a hranpain Maresca manag zângnadawmna atan pound maktaduai 17 an seng nia sawi a ni bawk.

Maresca hian Chelsea coach a nih lai khan City nen indawrna an lo nei daih tawh a, hei vanga banna pawh thehlut ngam nia sawi niin, Etihad Stadium-a Pep Guardiola thlaktu nih a châk.

A hun laiin media ṭhenkhat chuan Blues-in an ban ang hialin an sawi a, fans tam takin season an hman chhiat zui avangin club neitute an dem - tunah erawh thudik a lang chhuak a, an ban ni loin, ama thuin a bang tih a lang.

Maresca chuan, "Season laklawh lai taka ka chhuahsan avangin Chelsea tan harsatna ka thlen tih ka hria a, in ngaihdam ka dil a ni," a ti a, Blues fans tam takin thudik an hriat takah chuan ngaihdam erawh an harsat ang.

Italian coach hian Blues tan Europa Conference League leh FIFA Club World Cup nomawi a chawi a, city-ah Pep Guardiola hmun ruak a luah dawn avangin a awlsam dawn lo.