Intumtawk tur Belgium leh Senegal

Zanin dar 1:30-a World Cup match-ah Belgium leh Senegal te an inhmachhawn dawn a, team pahnih hi intiat tawk tak an nih avangin inkhel hmuhnawm a beisei ngam a, men rei a sual lo ang.

Team pahnihte hi group match tawp berah an dinhmun a chiang ve chauh a, kumin inelnaah bul an ṭan ṭha tawk lo a, rinhlelhna nen thlir an ni hman hial. Mahse an match hnuhnung berah goal nga ve ve an khung thei a, round of 32 luh an phu takzet.

Belgium tan vawi 112 zet khel tawh Thibaut Courtois chu si ban nghaktu a ni leh dawn a, a hmaah ding turin Arthur Theate leh Brandon Mechele te an dam ṭha a, full back-ah Timothy Castagne leh Maxim De Cuyper ten bul an ṭan leh a rinawm.

Hetihlai hian Zeno Debast Pathianni khan training zawm leh tawh mah se, a dinhmun a ka chiang thei lo a, a inlan thei tawh a nih pawhin bench-ah a ṭhuttir a ni zawk ang.

Tlarhma lamah Leandro Trossard chuan goal hnih thun tawhin, kumin World Cup-ah Red Devils tana goal thun hnem ber a ni a; Kevin De Bruyne, Romelu Lukaku, leh Alexis Saelemaekers te pawhin goal khat ṭheuh an khung tawh bawk. Manchester City winger Jeremy Doku an la neih cheu avangin Senegal hmachhawn turin an inrintawk khawp ang.

Hetihlai hian Senegal hi African champion tia chhal ngam an ni a, an hmelma Morocco-in ram lian an hneh laia hneh lo bik nih an duh dawn loh avangin thapui an thawh dawn.

Chutihrualin Senegal hi an keeper Edouard Mendy chu Norway nen an hmachhawn ṭum khan a khup a tihnat avangin a, Chelsea keeper hlui hi a dinhmun a chian loh avangin Iraq laka goal chhuah lo Mory Diaw-a'n bul a ṭan a rinawm.

Captain Kalidou Koulibaly pawh Norway lakah a chet ṭhat tawk loh hnuah bench-ah ṭhu mah se, Belgium lakah defender tawnhriat ngah hi a inlan leh tawh zawk. Iraq an hmachhawn ṭuma che ṭha tak Abdoulaye Seck pawh ngaihthah a thiang lo ang.

Tlarhma lamah Ismaila Sarr leh Sadio Mane te chu an innghahna an ni leh dawn a, Chelsea forward Nicolas Jackson thlawpin Belgium lakah goal khung ngei an tum dawn.

Team pahnih inkhela chak zawk hian USA leh Bosnia inkhela chawk zawk zawk an hmachhawn leh dawn a, an hmaa ding turte hi ram lian tia sawi tur an nih loh avangin quarterfinal luhna kawng a inhawng zau dawn.