Champion tura rinkai Spain inlan zan
European Champion Spain chuan zanin dar 12:30-ah Austria an hmachhawn dawn a, Luis de la Fuente hote hi champion inbeisei ngam an nih bakah an insiamrem tawh avangin en an châkawm dawn.
Spain an ṭha
Group H-a pakhatna Spain hian an match hmasa berah Cape Verde an inhnehtawkpui a, rinhlelhna nena thlir rawn an nih hnuah an chak ve ve a, goal ruk an khung bakah goal an chhuah lo a, an hneh zingah vawi hnih champion tawh Uruguay an tel.
Spain hi an tlarhnung phui mah se tlarhma lamah hliam an ngah a, Yeremy Pino, Nico Williams leh Victor Munoz te chu an inhliam avangin an dinhmun a chiang lo vek. Mahse Mikel Oyarzabal leh Ferran Torres an awm a, Uruguay laka chakna goal khungtu Alex Baena a khelh ṭhat bawk avangin mangang lutuk tur an ni lo.
De la Fuente-a'n midfield-ah duhthlan tur a ngah a, Uruguay an hmachhawn ṭumin Mikel Merino bul a ṭantir a, mahse Fabian Ruiz, Dani Olmo, leh Gavi te'n Austria lakah Arsenal midfielder aiin an inlan a rinawm zawk.
An innghahna tur ber erawh Lamine Yamal a ni a, Barcelona forward hi a inlan tawh chinah a hmuhnawm a, Austria tan ven bik a sual dawn lo. Yamal hian Spain a thlen sanpui a, a khelh ṭhat bawk chuan 'Best Young Player Award' bakah 'Golden Ball' dawng thei tur a ni.
Austria ve thung
Austria tan player pawimawh David Alaba leh Marko Arnautovic te chu Algeria nen an inkhelh ṭumin hliam tenau an nei a, mahse Spain an hmachhawn theih a beiseiawm.
Zaninah Alaba leh Arnautovic te hi an khel thei lo a nih pawhin anmahni thlak turin Kevin Danso leh Michael Gregoritsch te an awm a, Sasa Kalajdzic rawn che ṭha viau mah se bul a ṭan a rinawm loh.
Midfield-ah Borussia Dortmund midfielder Marcel Sabitzer leh Bayern Munich player, Konrad Laimer te an nei a, Spain tan ngaihthah chi an ni dawn lo. Chutihrualin La Roja hneh turin Sabitzer leh Laimer te hian an theihtawp an chhuah a ngai tawh ang.
La Roja an chungnung
Ram pahnihte hi vawi 16 an lo inhmachhawn tawh a, Spain hi vawi kua chakin Austria vawi li an chak a, ṭum thum an inhnehtawk. An intawn hnuhnung ber chu November 2009 daih tawh kha niin 5-1 in an chak.
Mahse Spain hi 2010 World Cup an champion hnuah beisei an phâk lo a, round of 16 ai sang an thleng leh lo. Kuminah erawh Euro champion lai an nih avangin an beisei a sang a, mahse round of 32 a awm thar avangin last 16 pawh thleng thei lo dinhmunah an ding.