Norway chakpuitu Haaland

Norway manager Stale Solbakken-a'n France lakah 'team B' luhtirin chak zo lo mah se thutlukna a siam sual lo. Thawhlehni zan khan an ṭhat theih dan berin Vikings an inlan a, Ivory Coast 2-1 in an hneh. Goal khungtu ropui Haaland-a'n chakna goal a khung.

Khawvelin Kylian Mbappe leh Erling Haaland te inhmachhawn an thlir châk laiin Manchester City striker hi bench-ah dah a ni a, Haaland-a'n Mbappe inkhel lai a thlir ta zawk. Norway-in Sweden aiah Ivory Coast hmachhawn an thlang a, an tisual lo - last 16 an lut tlat.

Solbakken-a'n Les Bleus an hmachhawn ṭumin player 10 a thlak a, Ivory Coast an hmachhawn ṭumin player 10 bawk a thlak. Bodo/Glimt midfielder Patrick Berg chauhin bul a ṭan nawn a, Haaland bakah player ṭha dang Martin Odegaard, Alexander Sorloth leh Kristoffer Ajer te an inlan vek.

Ivory Coast-in Curacao an hneh ṭuma goal khungtu Nicolas Pepe bul an ṭan nawntir a, Amad Diallo erawh bench-ah a awm thung. Dallas Stadium-ah inkhel hmuhnawm an chhawp chhuak a, Ivory Coast goal bawh a na hle.

Goal ropui pahnih chhawp chhuah a ni a, minute 39-naah Antonio Nusa-a'n Norway tan mawi zetin a hlai lut. Kum 21 mi Nusa hi RB Leipzig tan a khel mek a, club lian chiltiputtu a ni thei ang.

Norway-in goal khat an chakpui mai dawn a, a lan laiin Ivory Coast substitute Amad Diallo-a'n goal ropui a khung. Manchester United winger hian Norway defender a bum kual hnuah minute 74-naah goal ṭha bik a khung a, Lionel Messi goal khung niawma mawi a ni.

1-1 a nih leh tak avangin inkhel boruak a nung chho a, a tawpa team pahnih danglamna chu Haaland a ni. Norway-in mawi zetin Ivory Coast tlarhnung an ṭhiat a, Patrick Berg-a ball duhthusam chu Haaland-a'n a pal goal. Goal ropui ni lo mah se goal pawimawh a ni.

Ivory Coast-in hun tawp thlengin tha an thlah lo a, injury time-ah Amad Diallo-a'n freekick ṭha zetin pet mah se goalkeeper Orjan Nyland-a'n hming chher nan a hmang. Norway-in Haaland goal hmangin hnehna an chang a, round of 16-ah Brazil an hmachhawn ang.

Haaland hian ram tan match 53-ah goal 60 a khung a, competitive match-ah a zawnin match 13 chhung goal a khung tawh. Goal a khung ṭumah hian Norway match 16 chhung an chak zawn tawh. Manchester City striker hian France a hmachhawn lo chungin tun inelnaah goal nga a khung der tawh a, match thum a khelhah a inlan vek.