Deschamps, i tan chauh aw!

France coach Didier Deschamps-a'n World Cup laiin a nu a sun a, group stage match tawp berah a naute ho thei loin, a nu vui tura a haw a ngai hial - a awm loh hlan pawhin an chak tho a, a lo kirna inkhelah 3-0 in an chak zui.

Les Bleus captain Kylian Mbappe-a'n goal hmahruai a khung hnu khan an coach lam hi panin a tlan phei a, a kuah vawng vawng - hun hrehawm tak a tawn laiin an pu ber hi an hre reng tih a lantir.

Deschamps chuan, "Kylian-a thil tih khan min hneh takzet. France tana kan inhrawn tirh aṭangin entawn tlak tak a ni nghal. Team kan inlungrual a, ka awm loh lai pawhin an hna ṭha takin an lo hlen a ni.

"Team inlungrual vangin kan chak kher lo a ni mai thei a, mahse, team inlungrual lo erawh an tlawm ṭhin," a ti a, an team chu inlungrual taka an thawh ho avangin thui tak an thlen a rin thu a sawi.

Deschamnps hian World Cup-ah match 18 zet a team hnehna a chanpui ta a, World Cup-ah heti zat match chak thei manager dang an la awm lo - a record hi uanpui tham a tling.

France-in hun harsaah an pu an hre reng tih an pholang a, Deschamps pawh hian a captain Mbappe a lakchhuah hian zahna chibai a lo buk. Player ṭha bawk, coach ṭha bawk, boruak ṭha bawk an ni a, France-in hma lam an pan zel.