Mumang ramah Mexico an cheng
Kumin World Cup thlengtu zinga mi Mexico chu mumang ramah an cheng zel a, Nilaini zing khan Ecuador chu 2-0 a hnehnin last 16 an inpetkai. Javier Aguirre-a naute hian last 16 pawh an ramah an la khelh dawn avangin inrintawkna an ngah sawt ang.
Mexico tan kumin World Cup opening match-a goal khungtu pahnih - Julian Quinones leh Raul Jimenez ten goal khat ve ve an khung a, Ecuador-in a chhanletna tur an nei ve lo.
A thlengtu Branch
Estadio Banorte, Mexico City-a inkhelah mahni ram leilunga khel Mexico an hlauhawm hmasa a, Gilberto Mora leh Jimenez ten chance an nei nghal a, mahse hmahruaina goal an khung thei lo.
El Tri an vanduai rei lo a, minute 22-naah Quinones chuan chak taka ball a um luh hnuah kawh zetin a pet goal a, a team hma a hruaipui. Quinones hian inelna kal mekah goal thum a khungna chiah a ni.
Kum 29 mi hi Saudi Pro League player a ni a, Al-Qadsiah tan khel mekin season hman zawh takah khan goal 33 a khung a, Ivan Toney, Cristiano Ronaldo leh Joao Felix te aiin a khung hnem zawk.
Mexico an phur laklawh a, minute kaw hnu lawkah Jimenez-a'n goal a khung chhunzawm. Fulham striker hian ama ball hloh a chan leh hnuah Quinones nen in pass lehin goal kilah tak a pet lut a, an hmahruaina a belhchhah.
Jiminez hian chance nei chhunzawmin Gilberto Mora hnen aṭanga a ball hmuh chu a pet goal thei lo a, a vanneih zan ni se first half-ah goal dang khung belh thei tur a ni.
Second half-ah Ecuadro-in ball chang hnem zawk mah se chance insiam an harsat a, Pedro Vite leh Kevin Rodríguez ten an chance neih chhun an hlah. Tricolours (Ecuadro sawina) hi an match hnuhnung bera Germany hnehtu an ni tih awih a harsa.
Hmui hup case
Hun pek belhah Ecuador defender Piero Hincapie-a'n hmui hup chungin Mexico forward Santiago Giménez a bia a, a thil sawi hi hriat ni lo mah se match referee-in VAR a rawn hnuah red card pek a ni.
Si hnih phur chunga kim loa khelh a ngaih bakah, hun a tlem tawh avangin Ecuador tan thawhchhuah ngaihna a awm tawh lo a, a tlawm zawkah ṭangin an World Cup zinkawng a tawp.
El tri an tlo
Javier Aguirre-a enkawl Mexico hi thleng sang tura rin hlawh zingah tel pha lo mah se, an khel ṭha tak zet a, match li an khelh tawhah goal riat khung tawhin goal an la chhuah lo.
Kum dang angin player langsar kawl tam lo mah se an inlungrual a, a thlengtu an nih bawk avangin an tawh a khirh hle, last 16-ah England leh DR Conga-a chak zawk zawk an hmachhawn leh ang.