Ropui takin Dimitrov a lo kir

Bulgarian player Grigor Dimitrov chu thla 12 zet hliam vanga a chawlh hnuah, kuminah ṭha takin a khel leh thei tawh a, Wimbledon round khatnaah Australian player Dane Sweeny chu 7-6 (7-4) 6-3 7-5 in Thawhlehni zan khan a hneh.

Kum 35 mi Dimitrov hi nikum khan World no. 1 Jannik Sinner lakah set hnih ngawta hma a hruai tawh hnuah, a awm ruh a tihnat avangin a khelh chhunzawm thei lo a, mittui nen court a chhuahsan.

A zawnin Grand Slam vawi nga ngawt Dimitrov hian a khel thei lo a, a hliam hi a nat bakah a kum a lo tam ve tawh avangin a chawlh mai ringtu an tam hle. Mahse ṭha takin Dimitrov a lo kir a, Sweeny laka hnehna a chan chu a dam chhung zawnga a theihnghilh tawh ngai loh tur a nih thu a sawi.

Dimitrov chuan, "Wimbledon-in wildcard min pea min rin ngam avangin ka lawm takzet. Min ngaihhlutzia a lang a, court chhungah khan hmangaihna thuk tak ka dawng tih ka inhre thei.

Thla 12 hnua rawn let leh a, hnehna chan leh hi ka tan chuan a hlu tak zet. He infiamna hi ka ngai hlu a, a ṭha thei ang bera khelh leh hi ka lo suangtuah dan a ni. Hemi rual hian, min beiseitute hi tihbeidawn ka duh lo.

Ka inkhelh tawh hoah hriat reng tur hun pawimawh tak tak ka lo tawng tawh a, mahse vawiina thil thleng hi chu ka hriat reng turte zingah a tel chiang khawp ang," a ti.