Coventry tan Lampard a rinawm

Premier League kai thar Coventry City manager Frank Lampard chuan a club tan rinawmna thu a tiam nawn a, club lian dangte nen sawizawm hlawh mah se, kum 2029 thleng Coventry enkawl turin contract thar a ziak.

Lampard hi a contract neih lai ang chuan, nakkum nipui laia contract hmang zo tur a ni a, amah hnim hnaitu zingah Fulham hming pawh a ri ring viau. Mahse, a tawpah chuan Coventry-a cham a thlang ta zawk.

English midfielder ropui ṭhin Lampard chuan, "Champion nomawi chawi a, EPL khel phak tura inpetkai nan kan zavaiin kan thawk rim a, kan hlawhtlinna hi kan lawm tur a ni - a khawpui ang pawhin kan lawm ṭha hlein ka hria.

"Staff kan nihna anga pawimawh ber chu rilru tihhahdam ve hi a ni a, chutihrual chuan season thar atana kan thil duhah te rilru kan pek a ngai bawk. Khelmual chhung leh pawnah hnathawh tur tam tak kan la nei a, kan thawk mek zel bawk.

"Ka player-te nena hna kan thawh ho leh hun ka nghakhlel takzet a, season thar atana inpuahchah ho a châkawm leh tawh a ni," a ti a, season thar a nghakhlel hle.

Lampard hian November 2024 khan Mark Robins thlakin, Sky Blues (Coventry sawina) hi a enkawl ṭan a, hetihlai hian Championship-ah 17-na niin, relegation zone an hlatna chu point hnih chauh a ni.

Mahse, Lampard-a'n a enkawl hnuah league match 29 khelh tur an la neihah vawi 16 a chakpui a, playoff a khelhpui hial. A season hnihnaah chuan playoff khelh ngai loin Lampard-a'n Coventry a tlinpui a, EPL an hmachhawn dawn ta.