Inhlau lo tawn tur Switzerland leh Algeria

FIFA World Cup 2026 round of 32-a team intiat tawk tak tura ngaih, Switzerland leh Algeria te naktuk zingah an inhmachhawn dawn a, an inkhelh hun hi dar 8:30 a nih avangin en a nuam tawk dawn.

World Cup an khelh tawh dan aṭanga enin Switzerland an ṭha zawk a, vawi thum quarterfinal an lut tawh. Mahse 1954 kha an luh hnuhnun ber ṭum a nih avangin innghahna chi erawh a ni lo. Algeria erawh vawi khat chiah knockout stage an la lut a, 2014 khan round of 16-ah Germany-in an pet tla.

Algeria pawhin tun hma aiin Europe-a inlan thei player ngah mah se, an innghahna tur erawh Riyad Mahrez tho a la ni.

Hello Swiss

Switzerland sawi apianga hming lo lang ṭhin Xherdan Shaqiri a awm tawh lo a, Liverpool forward hlui hi awm tawh lo mah se Granit Xhaka an la nei a, Sunderland midfielder hlui hi an innghahna a ni.

Switzerland lamin hliam vangin an full back Silvan Widmer an chhawr thei dawn lo a, player dang erawh an dam kim thung. Canada an hmachhawn ṭuma a chet ṭhat avangin Luca Jaquez chuan bul a ṭan a rinawm a, Nico Elvedi leh Inter Milan defender Manuel Akanji te nen tlarhnungah an ding ho ang.

Midfield-ah Xhaka bakah Sevilla duo Djibril Sow leh Ruben Vargas te an awm a, Chelsea tan pawha khel tawh Denis Zakaria an la neih bawk avangin an ṭha thawkhat.

Tlarhmaah Breel Embolo, Nottingham Forest forward Dan Ndoye leh Leeds United forward, Noah Okafor te an nei a, Algeria lakah an zam dawn lo.

Mahrez leh a hote

Algeria tan Mohamed El Amine a dinhmun a chiang lo a, Wolfsburg forward hi awm lo mah se Riyad Mahrez leh Amine Gouiri te an awm a, Mahrez hi a vanglai pel ve tawh mah se Switzerland laka danglamna thlen turin theihna sang tak a la nei.

Desert Warriors (Algeria sawina) tan Zinedine Zidane-a fapa Luca Zidane-a'n goal a veng leh dawn a, a hmaah Manchester City defender Rayan Ait-Nouri leh Borussia Dortmund centre back Ramy Bensebaini te an ding leh dawn bawk.

Mahrez te thlawp turin midfield-ah Lyon midfielder hlui Houssem Aouar, Tottenham tan pawha khel tawh Nabil Bentaleb te bakah, Bayer Leverkusen rawlthar Ibrahim Maza te an awm dawn a, a vawi hnih nan last 16 luh an tum dawn.

An sulhnu

Ram pahnihte hi an vawi thum intawnna tur chauh a ni a, an intawn hnuhnun ber pawh 1986 daih tawh kha a ni a, friendly-ah 2-0 in Switzerland an chak zawk. Mahse kum 40 zet a liam tawh avangin thil a danglam tawh.

An intiat tawk lai ber tura ngaih a ni a, football khawvelah ram lian tia sawi tur ni lo mah se inkhel hmuhnawm a beisei ngam.