Ronald Koeman-a'n banna a theh lut

Netherlands head coach Ronald Koeman chu round of 32-a Morocco an hneh loh hnuah a bang a, kum hnih leh a chanve a enkawl hnuah a hna aṭangin banna a theh lut.

Koeman-a naute hi group stage-a pakhatna an nih hnuah last 32-ah Morocco nen hun pangngaia an inhnehtawk hnuin, penalty-ah an chak lo a, Oranje hi enkawl chhunzawm zel aiin kalsan a thlang ta zawk.

Kum 63 mi Koeman chuan, "Ka hun kal tawh ka thlir let hian, ka inchhuang takzet. Ka thawhpuite hian min chher hriam bakah hun hlimawm tak min hmanpui a, chu chu a hlu ka ti hle. World Cup champion nih chu tu pawhin kan duh vek a, mahse chu chu a thleng ta si lo. Kei aia pawi ti hi an awm kher lo ang.

Kum kal ta khan football aia pawimawh zawk thil dang tam tak a awm tih min hriatnawn tir a, Football hi ka nunah a bet ṭhin ngei mai, mahse hriselna hi eng thilin mah a lei theih loha hlu a ni," a ti.

Koeman hi a nupui chu hnute cancer vanga enkawl mek a ni a, Dutch manager chuan,"I hmangaih em emin hun harsa tak a hmachhawn mek a nih chuan, kan thil thlir dan leh ngaihtuahna a danglam ṭhin," a ti a, football a hawisan rih dawn niin a lang.

Hetihlai hian Dutch player penalty hlahtu - Justin Kluivert, Quinten Timber leh Crysencio Summerville te chu, social media kaltlangin vun rawng inhmuhsitna rawngkaia beih an tawk a, he thil hi Royal Dutch Football Association (KNVB) chuan a chhui dawn.

England player Marcus Rashford, Bukayo Saka, leh Jadon Sancho-te chu 2021 Euro final-a Italy laka penalty an hlah avangin beih an lo tawk tawh a, he thil thleng chungchangah hian mi pahnih chu lung in tan tir an ni a, thubuai siamsak pakhat an nei bawk.