Belgium-in an zia an chhuah

Kumin World Cup khelha beisei phâk lo zinga mi Belgium-in round of 16 an lut ta - 2-0 a an hnufual reng hnuah Senegal lakah an 'comeback' a, Nilaini zan khan 3-2 in an chak.

Belgium hian 2-0 a an hnufual reng hnuin, minjute 85 hnu lamah an si phurh an sut zo! Extra time khelh zui a ni a, minute 120+5-ah penalty hmangin Belgium hian chakna goal an khung!

Senegal tan Habib Diarra leh Ismaila Sarr ten goal khat ve ve an khung a, Belgium tan Romelu Lukaku leh Youri Tielemans ten an sut hnuah, Tielemans-a'n extra time-ah penalty hmangin an chakna goal hi a khung a ni - tun World Cup-a penalty shootout thleng teuh ber an la ni rih e!

Senegal an ṭha

Lumen Field, Seattle-a inkhelah Senegal-in bul an ṭan ṭha zawk a, Ismail Jakobs-a cross chu Senegal forward Sarr-a'n goal ban a pet per a, a per let chu tlu chungin pet leh nghal mah se goal zawnah a pet tawh lo. Idrissa Gana Gueye-a'n Courtois a rum ṭhaih bawk.

Sarr a hlauhawm chhunzawm a, minute 24-naah an thiampuipa Sadio Mane ball vawrh luh chu goal ban a tauh per a, Diarra chuan a per let chu chiang zetin goal ruakah a khung a, Senegal hma a hruaipui.

Goal an chhuah hnuah hma sawn hret mah se Belgium an insiamrem thei lo a, Jeremy Doku nung viau mah se chance a siam thei meuh lo a, chawlhlawk hmain Maxim De Cuyper chiahin first half-ah chance ṭha a nei thei.

Second half-ah a ngai ang bawkin Senegal an chungnung zawk a, Diarra-a'n goal dang khung theihna hun ṭha a bawlhpelh a, Sarr erawhin a hlah ve duh lo. Crystal Palace forward hian Minute 51-naah Moussa Niakhaté ball vawrh luh chu a awma a lak thlak hnuah, dan rual loha kawh zetin an goal hnihna a khung.

Beidawn loh rah

Goal hnih an chhuah hnuah Belgium an la beidawng duh chuang lo a, chak tawh lo tura ngaih an nih tawh hnuah Lukaku-a'n goal a khung leh hlauh. Lukaku hian minute 86-naah Thomas Meunier-a cross chu ṭha zetin a khung a, a team tan beiseina thar a siam.

Red Devils an ṭang fuh laklawh a, minute li hnu lawkah Leandro Trossard ke aṭanga chhuak chu Tielemans-a'n a tauh lut a, an si phurh a sut zo a, extra time khelh a ni zui.

Trossard-a ball cross aṭanga kal chu Senegal keeper Mory Diaw-a'n a khawih hman tura ngaih ni mah se ball kal dan a chhut sual a, minute 89-naah Belgium-in si phurh an sut zawh phah - chak tura ngaih tawh Senegal-in extra time an khel zui.

Vanneih kaltluang

Extra time-ah team pahnihte an fimkhur avangin goal hlauhawm hmuh tur a tam lo a, Belgium forward Dodi Lukebakio-a'n cross bar a pet per chu hlauhawm bera chhal ngam a ni.

Penalty shootout hmanga chak zawk an zawng tawh mai dawna a lan hnuah, Belgium-in penalty an hlawhchhuak hlauh. Hun tawp dawn tawhah Lamine Camara chuan Tielemans a titlu a, referee Saíd Martínez-a'n VAR hmanga a ennawn hnuah penalty a pe.

Tielemans-a'n boruak sangah ama penalty hlawhchhuah chu, boruak sangah zam loin a pet goal a, an chakna goal a ni zui a, an beidawn duh loh rah hmuin round of 16 an inpetkai - group stage-a beisei phak lo Belgium hi tunah chuan team hmachhawn châkawm lo an ni tawh.