Chak mah se USA lawm a kim lo

World Cup thlengtu zinga lian ber USA chuan nimin zing khan 2-0 in Bosnia & Herzegovina an hneh a, Folarin Balogun leh Malik Tillman ten goal an khung. USA hi round of 16 inpetkai mah se an lawm a kim lo a, a chhan chu goal khungtu Balogun hnawhchhuah a nih vang a ni. AS Monaco forward hian Belgium a hmachhawn thei dawn lo.

Inkhel tir lamah Bosnia an hlauhawm zawk a, Ermedin Demirovic-a'n USA keeper Matt Freese a en chhin nghal. Rawlthar duhawm Kerim Alajbegovic chuan corner aṭangin a pet goal ṭep a, mahse Freese bawkin a dang hman.

Stars and Stripes (USA sawina) an insiamṭha vat a, first half tawp hma hretin goal an khung. A offside vanga a goal khatna an pawm loh hnuah Balogun-a'n an hmahruaina goal a khung ta tho a, first half-ah a team hma a hruaipui.

Khel ṭha viau mah se Balogun a chesual zui a, ball an inchuhna lamah Bosnia defender Tarik Muharemovic-a ngal rekah a rap palh a, VAR hmanga ennawnna neih a nih hnuah red card a chawi a, hnawhchhuah a ni.

A tam zawk an nih hnuah pawh Bosnia an khel fuh hleithei lo a, ball chang hnem zawk mah se Demirovic bak chu chance ṭha nei thei an awm lo.

USA erawh an chance neih chhun an chhawr ṭangkai a, minute 82-naah Malik Tillman-a'n freekick aṭangin mawi takin a chhuih lut a, an chak nemnghehna goal ni zuiin harsatna tawk mah se round of 16 an inpetkai.

Mauricio Pochettino hote hi tun inelnaah che ṭha hle mah se ram lian tia chhal ngam an la tum meuh lo a, Group stage-ah Turkey chu hmachhawn tawh mah se an dinhmun a chian tawh hnu a nih avangin inkhel pawimawh a ni lo.

Last 16-ah Belgium nen an inhmachhawn dawn a, an golden generation anga ṭha ni tawh lo mah se Senegal laka thochhuak leh thei an nih avangin an ṭha thawkhat a, an hmatawng chhuanvawr Balogun-a tel lo loin quarterfinal luh an tum a ngai dawn.