Team intiat Colombia leh Ghana

FIFA World Cup round of 32 khelh meka team intiat tawh ber tura ngaih, Colombia leh Ghana te chu Inrinni zing dar 7:00-ah an inhmachhawn dawn a, round of 16 luh inchuhah a hmuhnawm ber zinga mi a ni dawn.

Ram pahnihte hi tun hmain an la intawng ngai lo a, an vawi khat intawnnah an World Cup zinkawng intihtawpsak an tum ve ve dawn. World Cup-ah quarterfinal aia sang an la thleng lo bawk a, an thlen chin pawh a intluk tawk hle.

Kuminah erawh Colombia an che ṭha zawk a, group stage-ah Cristiano Ronaldo telna Portugal nen awm ho mah se hmahruaitu an ni thei a, Ghana erawh an group-ah pathumna niin knockout round an lut hram.

Tricolour (Colombia) tlarhnungah Tottenham Hotspur defender hlui Davinson Sanchez leh Bologna centre back, Jhon Lucimi te chu an innghahna a ni leh dawn a, Crystal Palace full back Daniel Munoz a rintlak viau bawk.

Tlarhmaah Luis Diaz, Luis Suarez, leh James Rodriguez te an inlan thei vek dawn a, eng ram lakah pawh an zahpuiawh loh. Sporting Lisbon forward Suarez hi Portugal lakah hliam tenau vangin khel thei lo mah se a inlan thei tawh dawn.

Defence leh tlarhma pui kawp turin Jefferson Lerma leh Gustavo Puerta te an awm bawk avangin Colombia an zam dawn lo.

Ghana tan an innghahna Antoine Semenyo chu a ke rek hliam avangin a dinhmun a chaing lo a, mahse Manchester City forward hian Colombia a hmachhawn theih a beiseiawm.

Kum 26 mi forward hi awm lo mah se ram tan vawi goal 34 thun tawhtu a Jordan Ayew an la nei a, Ayew hi a tawnhriat avang ringawt pawhin thlamuanpui tham a ni.

Midfield-ah Arsenal player hlui Thomas Partey-a hoin an inlan thei dawn a, mahse an 'first choice keeper' Lawrence Ati Zigi pawh a duhthusama a la fit loh avangin, Benjamin Asare chuan Black Stars (Ghana) bul a la tan chhunzawm a rinawm.

Black Stars hi group stage-ah beisei pha chiah lo mah se champion tura rinkai zinga mi, England inhnehtawkpuiin an chelh theih avangin inrintawkna an ngah dawn a, hlauh nei loin an khel dawn.