Salah a dam chiang lo em ni?

Egyptian forward Mohamed Salah chu chawn tha na a la dam chiang lo a, zanin dar 11:30-a Australia nen round of 32 an khelh turah a dinhmun a chiang lo.

Salah hi group stage match hnuhnung bera Iran nen an inhnehtawk ṭum khan, minute 57-naah hliam a neih vang hian lakchhuah a ni a, a hliam hi en dik tawh niin a serious lo a, training a zawh leh tawh avangin a inkhelh beiseitu an tam hle.

Egypt coach Hossam Hassan chuan Salah chungchangah rilru tihhahna tur a awm loh thu a sawi a, mahse Salah hi a inkhel a nih pawhin bul a ṭan a rinawm loh. Liverpool forward hi awm lo mah se Omar Marmoush an la nei a, Manchester City forward hi Australia laka danglamna thlen thein turin theihna sang tak a nei.

Kum 34 mi Salah hian an ram chu a vawi khat nan knockout stage a hruai thleng a, match thumah goal khat leh assist pahnih a nei tawhin a kum tam ve deuh tawh mah se Egypt innghahna ber a la ni.

Pharaohs hi Salah-a chungchangah lo pawh buaina an nei a, center-back Mohamed Abdelmonem chu a khup a tihnat avangin Iran lakah khan minute 14-na lekah lakchhuah a ni a, left back Ahmed Fatouh chu a tihrawl na vangin a inlan theih a rinawm loh bawk.

Hetihlai hian Australia pawh an dam kim bik lo a, Jacob Italiano leh Mathew Leckie te an chhawr thei dawn lo a, mahse midang an dam ṭha thung. Socceroos tan vawi 18 inlana goal ruk khung tawh kum 20 mi Mestory Irankunda chu an hmachhuan ber a ni leh ang.

Australia hi an tun hma angin player langsar nei lo mah se, an inlungrual ṭha a, USA chauh hneh loh an la neih bawk avangin an team boruak ṭhat lai a ni a, round of 16 lut turin beiseina sang tak an nei.