Forest-in Pereira an ban, Glasner a lut dawn

Premier League club Nottingham Forest chuan an manager Vitor Pereira chu thla li hnu lawkah an a ban a, an ban chhan hi Crystal Palace manager hlui Oliver Glasner lak luhna remchang an neih vang a ni.

Season hman zawh takah khan Forest hi season tir aṭangin an buai nghal a, Tottenham coach hlui pahnih Nuno Espírito Santo leh Ange Postecoglou te chu result ṭha an neih theih loh avangin an ban ve ve.

English football-a tawnhriat ngah Sean Dyche ruai leh mah se rei lote hnuah an ban lehnghal a, Pereira hi la lutin thla 18 cham turin an inrem. Portuguese coach hian Forest hi Premier league-ah a inhamtanpui bakah Europa League-ah semifinal a thlenpui.

Pereira hnuaiah season khar chhe lo mah se Conference League-a Crystal Palace champion puitu Oliver Glasner an duh a, Pereira an lak aṭanga thla nga lekah an chhuahtir leh nghal.

Kum 57 mi Pereira chuan, "Club thutlukna hian min ṭhawng takzet a, mahse club-in a hma hun atana ṭha ber nia a hriat anga thutlukna siam tura dikna a nei a, chu chu ka zahsak hle.

Nottingham Forest hi thinrimna leh lungawi lohna rilru engmah nei lovin ka chhuahsan tih ka sawi duh a, zah tak chung leh kan thawhhona avanga lawm tak chungin ka chhuahsan a ni.

Helai hmuna ka hnathawhte hi ka hre reng tawh dawn a, a hma aia an lo len zawk bakah hlawhtlinna tam zawk an lo chan theih nan duhsakna ka hlan," tiin a Forest a thlah.