Arsenal-in Barcola an duh

Premier League champion Arsenal chuan Paris St-Germain forward Bradley Barcola chu lakluh tumin an hel dawn a, French club hian hralh an pawi ti lo nia sawi a nih avangin Gunners hi an phur thar niin an sawi.

Arsenal scout ṭhenkhat chuan Barcola hi France leh Sweden inkhelah khan a hmunah an en niin an sawi a, goal a khung - Gunners scout-te lung a dum lehzual sawt ang.

Premier League champion hian Aston Villa player Morgan Rogers chu an duh ber a ni a, mahse, kum 23 mi manah hian Villa chuan pound maktaduai 130 an chhiar. London club hian heti zat zat sum insen hi an huam lo niin an sawi.

Barcola hi Liverpool nen pawh sawizawm a ni ṭhin a, Reds-in lakluh tuma a club khelhna an dawr thlap tawh, RB Leipzig forward Yan Diomande chuan PSG a thlang nia sawi niin, hei vang hian Liverpool pawh hian Barcola lam an hawi leh mai thei.

PSG pawhin Diomande an chân dawn takah chuan Barcola hralh hi an pawi ti lo nia sawi a ni a, Paris club-a a contract neih lai hi kum 2028 nipui thleng atan a nih avangin Rogers ai chuan a tlawm dawn hrim hrim tih a chiang.

Hetihlai hian Arsenal hian Leeds United goalkeeper Illan Meslier pawh an ngaihven nia sawi a ni a, David Raya nekchhuaktu tur ni loin, second choice keeper tur a ni thung ang.

Tun dinhmunah Arsenal number 2 Kepa Arrizabalaga hma hun a chiang lo a, hei vang hian Gunners hian keeper dang an melh zui. Kum 26 mi Meslier hi Leeds-ah number 1 a ni tawh lo a, tun nipuiah a contract a hman zawh dawn avangin Gunners hian free transfer-in an la thei dawn a ni.