Spurs player man to ber Mateus Fernandes

Tottenham Hotspur chuan West Ham United aṭangin pound maktaduai 85-in Mateus Fernandes an lalut a, an club chanchina player manto ber a ni. Portuguese midfielder Fernandes hi Manchester United nen pawh sawizawm a ni a, London club-a kal a thlang ta zawk.

Tu nge Fernandes?

Kum 21 mi Fernandes hi Portugal tan vawi khat a inlan tawh a, tun ṭum World Cup-ah erawh koh a ni lo. World Cup-ah khel pha lo mah se theihna sang tak a neih avangin duhtu pawh a ngah hle.

Season liam ta khan West Ham United tan Fernandes hian league match vawi 36 a khel a, goal thum a khung. London club a pan hma hian Southampton tan khel a, Saints-ah hian hming a chher hle. Chutihrualin Fernandes hian Hammers leh Saints te hi a relegate pui ve ve thung.

Kum 21 mi Fernandes hi Olhao, Portugal-ah a piang a, an khaw club Olhanense-ah bul ṭanin Sporting Lisbon a zawm hnuah professional contract ziakin a release clause atana an dah pawh €60mtd a ni pha daih.

Sporting aṭangin Portuguese club Estoril-ah loan-in a kal a, hetah hian hming a chher ṭan. August 2024 khan Southampton a zawm a, Saints-in an lakluhna man hi £40mtd chuang a ni.

Fernandes duhtu De Zerbi

Tottenham manager Roberto de Zerbi chuan, "Mateus hi ka player duh tak a ni a, ball nen theihna sang tak a nei a, a fin avangin kan khelh duh dan nen pawh a inrem. A kum ngaihtuahin Premier League-ah tawnhriat ṭha tak a nei a ni," tiin an player thar chungchang a sawi.

De Zerbi chuan sawi chhunzawmin, "Pressure hnuaiah pawh Mateus hian nuam ti takin a khel thei a, ball a kal hma pui thei a, team tana thawhrim bakah hun harsaah mawhphurhna a la thei bawk. Spurs hi a inzirna belhna tur hmun ṭha tak a nih ka ring," tiin a sawi.

Season liam ta khan Spurs hi relegate thei dinhmunah an ding a, league match hnuhnung berah Everton 1-0 a hnehin an him hram. Tun season-ah erawh inham tang ringawt tum loin Champions League khelh phak ngei an tum niin an player lak dan aṭangin a ngaih theih.

Spurs an tal na

July thla a inṭan chauh a, Spurs-in player panga an lalut der tawh. Netherlands defender Jan Paul van Hecke chu Brighton & Hove Albion aṭangin pound maktaduai 52-in an lalut tawh.

Goalkeeper Martin Dúbravka, left back Andy Robertson leh centre back Marcos Senesi te a thlawnin an lalut tawh a, tunah club record fee-in Mateus Fernandes an lalut.

Spurs hian Sandro Tonali chungchangah Newcastle United nen pawh £100mtd-in inremna an nei tawh. Tonali an lalut leh thei a nih phei chuan De Zerbi-a'n midfield thar hlakin a lai a rem thei dawn.