Jannik Sinner a champion leh thei ang em?

Tennis inelna ngaihhlut Wimbledon inelna khelh chhoh mek a ni a, champion rinkai leh champion lai Jannik Sinner pawhin vawiin hian third round-ah Jenson Brooksby a hmachhawn ang.

Sinner hian nikum khan final-ah Carlos Alcaraz chu 4–6, 6–4, 6–4, 6–4 in an hneh a, kumin inelnaah hliam vanga Alcaraz a inlan theih loh avangin champion-na kawng a inhawng zau.

Chutihrualin kumin French Open-ah pawh Alcaraz a inlan thei lo a, Sinner-a'n hun ṭha a bawhpelh. A vawi khat nan Grand Slam-ah Alexander Zverev a champion a, German tennis star hi tun ṭumah hian seeded no. 2 niin Sinner-a elpui ber tur a ni.

Sinner hian Nilaini khan second round-ah Nuno Borges chu 7-6 (7-4), 7-6 (7-2), 6-4 in an hneh a, vawiina a hmachhawn tur Brooksby hian seeded zingah a tel pha lo. Italian tennis star tan harsa tur awmin a lang lo.

French Open champion Zverev-a'n nuam sain bul a ṭan lo a, first round-ah Alexander Blockx chu 6-4, 6-7 (8-10), 7-6 (7-5), 7-6 (7-0) in a hneh hram. Nizan khan Zverev hian Valentin Royer a hmachhawn a, result kan hre hman lo.

Seeded no. 3 Félix Auger-Aliassime pawhin Dino Prizmic leh Alexander Shevchenko te hnehin third round a lut. Seeded no. 4 Ben Shelton erawh Otto Virtanen hneh loin first round-ah a tla a, khawtual tlangval Shelton tla hma hi inelna buatsaihtuten pawi an ti khawp ang.

Tennis player zinga record nei ṭha ber Novak Djokovic pawhin second round-ah Stefanos Tsitsipas a hmachhawn chungin harsatna nei loin third round a thleng. Vawiin hian Arthur Rinderknech nen an inhmachhawn ang.