Serena Williams a chak lo nghal

Tennis hmeichhe player ropui ber zinga mi Serena Williams-i'n September 2022-a inkhelh a chawlhsan hnuah kum 44 mi niin a rawn kir a, Wimbledon hmeichhe singles first round-ah a tla nghal.

Thawhlehni khan Serena hian Centre Court-ah Maya Joint a hmachhawn a, Australian nula Maya hi 6-3 6-7 (6-8) 6-3 in a chak. Grand Slam vawi 23 zet chawi tawhtu Serena tan result lawmawm a ni lo.

First set tawp dawnah Serena hian a khup a tihliam a, hei vang hian inkhelh zawhah pawh media mite a hmachhawn lo. Serena hi a inhliam hnuah inkhel chhunzawm tawh lo turin thurawn pe mah se a zawm lo a, inkhelh laiin hliam vanga enkawl a ni lo a, inkhelh zawhah pawh tiang hawl tur pek tum mah se a hmang duh lo.

Vawiin hian Serena leh a laizawn Venus Williams te inkawpin doubles an khel dawn a, mah se hmeichhe singles-a Serena-i'n a khup a tih hliam avangin inkhel lo thei dinhmunah an ding.

Serena hi tun ṭuma a rawn kir hian kum 10 kal taa a khelh dan nen an khaikhin a, danglamna hmuh tur a awm. Kum 2016 khan forehand hmanga top spin chak zawng kha 72mph a ni a, kuminah erawh 66mph a ni pha chauh.

Backhand hmanga top spin chak zawng chu 70mph a ni ṭhin a, tunah erawh 69mph-ah tla thla thung. Chawhruala serve hmasa zawk chak zawng chu kum 2016 khan 109mph a, tun ṭuma hian 107mph-ah a tla thla thung. Kum 10 chhunga a tlak hniamna a tam hran lo a, mah se competitive match a khelh tam loh avangin court chhungah a che rang tawk tawh lo.