SWWCD leh Toyota Kirloskar Motor ten Midelte hmasawnna atan MoU an ziak

Social Welfare, Women & Child Development department leh Toyota Kirloskar Motor chuan Mizorama mitdelte'n zirnaa hma an sawn theihna atana hmalakna turin nimin khan Secretariat conference hall-ah thawh dunna thuthlung, memorandum of understanding (MoU) an ziak.

MoU-ah hian Mizoram sorkar aiawhin SWWCD secretary Lalzarmawii'n hming a ziak a, Toyota Kirloskar Motor aiawhin External Affairs & CSR vice president Ramesh Rao-a'n hming an ziak. Tarlan danin, Mizoramah khaw hmuh lama harsatna nei mi 2,035 an awm a, chu'ng zinga 1% vel chauhin eizawnna mumal an neia hriat a ni.

SWWCD minister Lalrinpuii chuan, Mizorama khaw hmuha harsatna neite'n zirna leh eizawnnaah harsatna an tawh nasat thu sawiin, "An harsatnate chu theihtawpa sutkianpui tura hmalak hi mi tin mawhphurhna a ni. Mi tinin zirna ṭha an dawn theih nan te, mahni intodelha khawtlanga pek let an neih theih nante he MoU hi rahbi pawimawh tak a nih ka beisei," a ti.

Toyota Kirloskar Motor executive vice president Vikram Gulati chuan, "Tunlai thiamna hmanga mihringte'n mahni inrintâwkna nena hna an thawh chuan nghawng thui tak a nei," a ti a; Mizoram sorkar nena an thawhhona kaltlangin ni tin khawsak tiawlsam turin khawl leh hmanraw changkang tak takte hmang ṭangkaiin hmasawnna a awm ngei a beisei thu a sawi.

INREMNA THUTHLUNGIN A KENTE

☑ Thawh khatna atan Special Blind School, Durtlang hnenah navinaut assistive mobile device 250, braille computer, printer leh AI scanner pek a ni dawn.

☑ Thawh khatna thlir chungin thawh hnihnaah navinaut assistive mobile device 930 sem leh tum a ni.

☑ Khawl hian khaw hmuha harsatna neite tan chêt velna bakah, zirna leh thil dangah a pui dawn a ni.