MPFA player of the season Edmund

Mizoram Professional Footballer Association (MPFA) leh Lawngtlai District Association buatsaihin nimin khan Lawngtlaiah Charity match buatsaih a ni a, MPFA Award semna neih a ni bawk. ISL-a East Bengal champion puitu Edmund Lalrindika chuan Rintlaka MPFA Player of the Season leh JL Enterprise Group Lawngtlai MPFA Fans Player of the Season chawimawina a dawng.

Rinnunga MPFA Young Player of the Season-ah Bengaluru FC midfielder Lalremtluanga thlan a ni a, football chanchin ziak ṭhin ZoFooty.com, Inkhel.com leh Mizo Football News te hnenah chawimawina hlan a ni bawk.

Nimin Charity Match-ah hian MPFA leh Lawngtlai XI an inkhel a, MPFA hian Zothanpuia goal hnih hmangin 2-0 in hnehna an chang. Charity match aṭang hian Rs 79,000 sum hmuh chhuah a ni a, rualbanlote ṭanpui nan hman a ni ang.