England vs Mexico: Inkhelh hmain a 'hot' nghal!
World Cup round of 32 chu vawiinah khelh zawh a ni a, chawlh pawh awm loin round of 16 khelh zui a ni dawn - England pawh an inkhel zo chauh emaw tih laiin, July 6, Thawhṭanni zing dar 5:30-ah an inlan lehnghal dawn a, inelna thlengtu zinga mi Mexico an hmachhawn dawn.
Team pahnih player dan khaikhinin England an sang zawk a, mahse, tun inelna an hmachhawn dawn aṭanga teh chuan Mexico hi team ṭha zawk an ni - match li an khelh tawhah an chak vek a, goal riat an khung tawh a, an lamah a la lut lo thung!
Mexico City-ah an inkhel dawn bawk a, Three Lions tan Mexico hmachhawn hi thil zuamawm a ni lo. Mahse, kum 1966 hnua a vawi khat nana champion tum team tan Mexico huphurh a inhmeh lo a, huaisen taka inkhel an hmachhawn a ṭul ang.
An fimkhur
England tan 'tactic' sawi thlen hma hauhin buaina tur a tam hle - Mexico hi inelna thlengtu an nih avangin ṭantu an ngah dawn a, high altitude a nih avangin English player tan khelh a harsa dawn a, an hotel thlenna turah buaina neih an hlau bawk!
Mexico hian round of 32-ah Ecuador an hmachhawn a, Mexico fans tam tak chu an inkhelh hma zanah Ecuador thlenna hotel bulah bengchheng an siam a, an thawm siam nasat avangin Ecuador player-te an mu thei lo.
Three Lions chuan hei hi hriain, an thlenna hotel hi puan zar loh hram an tum. Heti chung hian an thlenna hmun hi lo put ru thei a ni a, chuvang chuan an player-te chu inkhelh hma zana hahdam taka an mut theih nan, mut theihna hmanrua (sleep device) pek an ni ang.
An inpeih e
Three Lions tan high altitude avang ringawt pawhin inkhelh a harsa dawn tih a chiang a, mithiamte chuan infiammiten high altitude-a inelna an hmachhawn dawn chuan, kar khat emaw kar hnih emaw tal an lo awm lawk a ngai ṭhin niin an sawi.
Thawklehkhata boruak thar va nan thut hi infiammi tan a harsa tih a chiang a, England tan insiamremna hun a awm lo. Mahse, England boss Thomas Tuchel chuan, "Eng harsatna pawh thleng se, hmachhawn zel turin kan inpeih," a ti.
England hi Kansas khawpuiah an inkulh a, US bikah chuan an inkhelh hma zan chiahin an inkhelhna tur khawpui an thleng ṭhin. Hei hi an training lai video leh tactic te a put ruk loh nan an tih a ni a, uluk taka ven an ni - Mexico-ah erawh a hma ni hnihah an thlen a ngai a, an fimkhur seng dawn lo.
Siamṭhat a ngai
England hian an match hmasa bera Croatia an hneh khan fak an hlawh hle a, mahse, an match hnuhnung pathumah erawh beisei an phak lo vek - Tuchel-a tan chetsual a thiang tawh lo a, puanthuah tel nghal a ni mai!
Tlarhnung phui lo mawlh hi lu haina tham a tling a, mahse, he thu buatsaih a nih lai hian Reece James chu Mexico hmachhawn thei tur zingah a tel nia sawi a ni - DR Congo lakah Declan Rice chuan right back-a inkhel a khar a ngai hial.
Mexico lakah hnehna an chan dawn chuan Rice a pawimawh leh dawn a, Jude Bellingham sawi hmaih a thiang lo bawk. A tawpkhawkah chuan Harry Kane bawk innghahna a ni leh dawn a, goal nga khung tawhtu English striker hi goal khung belh tura beisei a ni ang.