Canada tan fiahna hautak Morocco
World Cup thlengtu zinga mi Canada chuan zanin dar 10:30 hian fiahna hautak an hmachhawn dawn a, Morocco nen round of 16 match hmasa ber an khel dawn. Canada tan Morocco hi ram lian an hmachhawn hmasak ber turah a ngaih theih avangin inkhel hmuhnawm a beisei ngam.
Canada hi
Group stage-ah Switzerland an tluk loh avangin Canada-in an ram chhuahsanin USA-ah an inkhelh a ngai tawh dawn a, mahse fans ngah tur zawk an ni dawn tho.
South Africa lakah Alphonso Davies chu minute 15 a la awm tihah bench aṭangin a lut a, Bayern Munich defender hi March 2025 hnua ram tana a inlan lehna hmasa ber a ni a, zaninah pawh bul a ṭan a rinawm loh.
Canucks tan South Africa laka chakna goal khungtu Stephen Eustáquio-a'n midfield lai a luah lum leh dawn a, Nathan Saliba nen an inkawp leh ang. A sirah Villarreal player Tajon Buchanan leh Liam Millar ten bul an ṭan a rinawm.
An innghahna tur ber erawh an tlarhma a ni a, inelna kal meka goal thum khung tawh Jonathan David chu an hmachhuan ber a ni leh dawn. Juventus striker kawppui tur hian Tani Oluwaseyi, Promise David leh Cyle Larin te an la nei cheu.
Hlauh nei lo
Group stage-ah pahnihna ni mah se Morocco hi Brazil lakah a chungnung zawk an ni thei a, tlawm nei loin an World Cup zinkawng an zawh mek a, an hneh tawh zinga champion inbeisei Netherlands an tel. Achraf Hakimi a awm dawn bawk a, an captain hi khawi hmunah pawh a khel ṭha ṭhin.
AFCON finalist Morocco-in player an nei ṭha a, tlarhma leh tlarhnung pui kawp turin Ayoub Bouaddi a awm dawn bawk a, kum 18 mi Bouaddi hian Brazil lakah theihna sang tak a nei tih a lantir tawh.
An tlarhma chu an inchhuanna tur a ni a, Real Madrid midfielder Brahim Diaz-a hoin Bilal El Khannouss leh Azzedine Ounahi ten Ismael Saibari an thlawp dawn a, Bayern Munich player thar hian goal thum a khung tawh avangin innghahna tlak a ni.
Morocco hi AFCON champion an nih bakah, World Cup hnuhnung bera semifinal thleng thei an nih avangin dah hniam an thiang lo a, chutihrualin Canada hi tlarhma nei ṭha an nih avangin zuam ngawt a thiang bik lo.