Spain-in Austria lakah harsatna tawk lo

Kumin World Cup champion tura rinkai zinga mi Spain chuan, Ningani zan khan Austria chu 3-0 in an hneh a, European champion hian round of 16 lutin a vawi hnih nana World Cup champion ni turin kawng dik an zawh mek.

Spain tan Mikel Oyarzabal chuan goal hnih a khung a, a goal khung karah hian Pedro Porro chuan vawi khat a khung ve bawk. Austria erawhin scoreline timawi tur ringawt pawhin goal an khung ve thei lo.

Spain nge nge

Inkhel ṭan aṭangin Spain an hlauhawm nghal a, Dani Olmo hmuhnawm viau mah se David Alaba hoin Austria tlarhnung an khelh ṭhat avangin goal a lut lawk thei lo.

Minute 28-naah Lamine Yamal-a corner pet aṭangin Marc Cucurella-a'n chiang zetin a pet goal a, mahse Pau Cubarsi chu Austria keeper Alexander Schlager a tihbuai avangin goal-ah pawm a ni lo. Oyarzabal-a'n ama chance insiam a hlah chhunzawm avangin Spain vanduai zan a ni dawnin a lang hman.

Mahse Spain dan reng theih an ni lo a, minute 36-naah Cucurella cross chu Oyarzabal-a'n cool takin a khung a, Schlager a che hman lo. First half tawp hma hretin Alex Baena-a'n freekick aṭangin bar a pet per a, Yamal-a'n keeper chauh a hmachhawn hnuah a pet goal lo bawk a, goal dang lut loin chawlhlawk an hmang.

La Roja bawk

Second half-ah pawh dan pangngaiin Spain-in ball an chang hnem zawk a, mahse Austria an inven uluk avangin chance an insiam hleithei lo.

Mahse La Roja lakah Austria an inveng rei thei chuang lo a, minute 66-naah Baena cross chu Porro-a'n a tauh lut a, an hmahruaina a belhchhah. Goal khung turin box chhungah Porro a tlan lut ṭha takzet.

Austria-in chance ṭha tia sawi tur an nei lo tluan a, goal zawnah vawi khat mah an pet lo. Spain erawh hun tawp thlengin an hlauhawm a, minute 89-naah Oyarzabal chuan a lungthu kim nan a pet goal leh a, nuamsa takin Spain-in last 16 an lut.

An hmabak

Luis de la Fuente naute hi hnehna an chan avanga lawm reng hman an ni lo a, a chhan chu July 6, Thawhṭanni zan hian Cristiano Ronaldo awmna Portugal nen an inhmachhawn leh dawn vang a ni.

Champion tura rinkai zinga mi ve ve ram pahnihte hian last 16-a intawng dawn a, European champion hian World Cup champion chhunzawm an tum leh dawn a, hetihlai hian Ronaldo-a'n a chawlh hma ngeia World Cup chawi an tum avangi thapui an thawh dawn a, team pahnihte chawl hman an ni lo.