Algeria hnehtu Switzerland an tlang

FIFA World Cup round of 32 khelh mekah nimin zing khan, Switzerland chuan 2-0 in Algeria an hneh a, inkhel inhnehtawk tak tura ngaihah Switzerland an chungnung zawk a, round of 16 an inpetkai

Switzerland tan Breel Embolo leh Dan Ndoye te chuan goal khat ve ve an khung a, Algeria-in a chhanletna tur an nei ve lo.

BC Place, Vancouver-a inkhelah Algeria an nung nghal a, Houssem Aouar leh Ramiz Zerrouki ten Switzerland tlarhnung pawp hmang ṭangkai mah se, goal hmaah an hriam tawk loh avangin chance hlauhawm an siam thei lo.

Switzerland erawhin an hun ṭha neih hmasak ber an hmang ṭangkai nghal a, Johan Manzambi-a'n Algeria defender te a duhtawka a tlan pel hnuah Embolo tan a pe a, Rennes forward hian goal ruakah khungin a team hma a hruaipui.

Red Crosses (Switzerland sawina) tan Dennis Zakaria leh Ricardo Rodríguez ten chance neih chhunzawm a, Algeria tan Aouar, Farès Chaibi leh Ibrahim Maza ten an hun ṭha neih an chhawr ṭangkai theih loh bawk avangin, first half-ah goal dang a lut tawh lo.

Second half-ah Switzerland in goal an khung hma a, minute 46-naah Algeria defender Ramy Bensebaini pass sual aṭanga kal zel chu, Rafik Belghali-a'n a pet chhuak ṭha tawk loh avangin Ndoye bulah tak a tla a, Nottingham Forest forward hian goal kilah tak khungin an hmahruaina a belhchhah.

Goal hnih an chhuah hnuah pawh Algeria an insiamrem thei lo a, an thiampuipa Riyad Mahrez-a'n Gregor Kobel tan vawi khat hna hautak a siamsak tih loh chu chance dang an nei meuh lo. Swiss player Fabian Rieder leh Remo Freuler te pet chu Luca Zidane-a'n a dansak a, an mualpho tur a chhanhim.

Switzerland hi ram lian anga chhal ngam ni lo mah se World Cup an hmang ṭha a, Colombia leh Ghana chak zawk zawk hmachhawn leh dawn mah se inrintawkna an ngah tawh dawn.