Wimbledon-ah French Open champion Andreeva a tla

French Open champion Mirra Andreeva chuan Nilaini zan khan Wimbledon second round-ah Barbora Krejcikova a hmachhawn a, 6-4, 5-7, 4-6 in an chak lo. Inkhelh zawhah Andreeva hian a racket a paih a, media mite a hmachhawn laiin a mittui a tla bawk.

Andreeva hi kum 19 mi lek a ni a, darkar thum dawn an inkhelh hnuah chak loin a la na hle. Inkhelh zawh hian racket a paih zawhah Andreeva hian, "Ka bang," tiin a team lam hawiin a ṭawng chuak bawk.

Russian nula Andreeva chuan, "Ka chak lohna aṭanga ngai awh tur hun ka mamawh rei dawn. Tunah chuan grass court kalsanin hard court atan training ka nei ang," tiin a sawi.

Second round ni mah se Andreeva hneh loh Krejcikova hi player satliah a ni lo a, Czech tennis star hian kum 2024 khan Wimbledon nomawi a chawi tawh a, kum 2021 khan French Open-ah champion tawh bawk.

Hliamin a tlak buak avangin tun ṭum inelnaah seeded a nei pha lo a, Andreeva tan second round-a Krejcikova hmachhawn hi vanduaina a ni. Kum 30 mi Krejcikova hian hnehna a chan hi a tunu damlo tan a hlan a, nizan khan third round-ah a hnampui Nikola Bartunkova a hmachhawn a, result kan hre hman lo.

Second round chinah hmeichhe seeded no. 10 chinah Mirra Andreeva bakah Elina Svitolina-i'n third round a thleng zo lo a, seeded no. 15 Diana Shnaider leh French Open finalist Maja Chwalińska te an tla tawh bawk.