Paraguay lakah France an him hram

FIFA World Cup-a Germany petthlatu Paraguay-in France laka hnehna chang turin tihhreh an nei lo a, Les Bleus hian harsatna tawk mah se Kylian Mbappe penalty hmangin 1-0 in an chak hram. Didier Deschamps-a hote hian July 9, Ningani zan hian Morocco nen quarterfinal-ah an inhmachhawn ang.

Knockout football

Paraguay-in France aiin player nei ṭha lo zawk tih hre mah se Germany an hneh tawh avangin inrintawkna a ngah sawt a, tum fel fai tak an nei bawk. Gustavo Alfaro hoten ball chan tlem pawi an ti lo a, goal chhuah loh chu an thupui ber a ni.

First half-ah Paraguay thil tum a hlawhtling a, France tlarhmaten goal zawnah ball an pet lo. Les Bleus tlarhmaa awmte hi Kylian Mbappe, Bradley Barcola, Michael Olise leh Ousmana Dembele te an nih avangin Paraguay-in hna ṭha tak an thawk.

Chutihrualin Les Bleus hian ball erawh an chang tam a, 80% daih ball an chang. Vawi 277 ball an in pass kual laiin Paraguay erawh vawi 42 chauh an inpe kual. Mahse, a pawimawh ber goal a awm miau loh avangin an thil tumah Paraguay an hlawhtling.

Danglamna penalty

Second half-ah France an rawn nung hret a, corner kick pet thutin Dembele-a'n a hmang ṭangkai thei lo. Midfielder Manu Koné-a'n hla tak aṭangin goal-ah ṭha zetin a pet a, Paraguay keeper Gill-a'n hming chher nan a hmang.

Minute 60-naah Desire Doue a rawn lut a, PSG forward hian danglamna a rawn thleng. Doue hian mual vei lam aṭangin box chhungah a la lut a, player paliin an hual laiin Diego Gomez-a'n a titlu. Referee Ilgiz Tantashev-a'n thil thlen dan a ennawn hnuah penalty a pe a, Mbappe-a'n keeper Gill bumin goal awmchhun a khung.

France-in goal an khung belh thei lo a, chutihrualin injury time-a Mbappe-a goal khung tur a zawn zata keeper Gill-a'n a dang chu a ropui danglam hle. Les Blues an phu angin 1-0 in an chak.

Khelh dan hmanlai!

Paraguay lamin chak dan kawng an zawng a, Mbappe tih thinrim tumin an chhaih buai nasa hle. Mahse, France captain hi inkhel boruak sangah a rilru a fim tlat. Mbappe-a'n penalty pet hmain Gustavo Velazquez-a'n penalty spot chu a lo chhui chhia a, Real Madrid forward-in penalty a hlah theih nana a tih a ni.

Gabriel Avalos-a'n France defender Dayot Upamecano nghawk a, Matias Galarza-a'n Jules Kounde hmai a khawih sak a, Michael Olise-a'n yellow card a hmuh theih nan Galarza hi a tlu der. A tawi zawngin Paraguay hian tharum thawh an hreh lo a, mak ang reng tak erawh yellow card pakhat pawh an chawi lo.

France player-te Paraguay khelh danah an lawm lo a, hun tawp ham rik zawh chiahah pawh keeper Gill-a'n Mbappe chibai tum mah se France captain hian a chhanglet lo.

Mbappe chuan, "Keini pawhin tenawm taka khelh dan chu kan thiam. Mawi taka inchei a, khelmuala hawihawm taka che turah min ngai. Mahse, keini pawhin an thiam ang kha chu kan thiam ve. Kha kha an football khelhdan hmang a ni a, football khelh danah dik leh dik lo a awm hran lo. An thiam dan anga min hneh an tum a, mah se a thiam zawk kan chak," tiin a sawi.

Didier Deschamps chuan, "Hun tawp dawn lamah kha chuan ka player lian ṭha pahnih kha Mbappe veng turin ka ti a, chuti lo chu inkhel tlak loah an chhuah mai dawn. Trick hrang hrang an rawn hmang a, an khelh dan kha mipuiin football en tura stadium an pan chhan a ni lo. Mahse, goal an venghim ṭha a, South American ho hi khelh an harsa ṭhin reng a ni," tiin inkhelh dan chungchang a sawi ve bawk.