Mo Salah telna Egypt an chak

Liverpool chhuahsan tur Mohamed Salah chuan World Cup knockout stage inkhelhah Panenka hmangin penalty a pet a, Egypt chu Australia lakah penalty shootout hmanga hnehna chanpuiin, World Cup round of 16 a hruai thleng ta.

A vawi khat nana World Cup knockout stage kheltu Egypt hi Australia nen 1-1 in an inhnehtawk a, extra time thlenga chak zawk an awm loh avangin penalty an pet. Egypt hian 4-2 a hnehna changing, a thiam 16 zingah an hming an ziak kai.

Egypt hian Australia lakah goal an khung hmasa zawk hrim hrim a, minute 13-naah vengtu nei lo Emam Ashour chuan Karim Hafez-a ball cross chu goal-ah a chantir a, Egypt tan chuan 'history' a ni nghal zel.

AFCON champion ngun ber ram ni siin Egypt hian World Cup an khel khat hle - an khelh chhunah pawh an ropui lo ṭhin a, Ashour-a goal khung kha tun World Cup-a goal ruk an khungna chiah niin, kum 1934, 1990 leh 2018 World Cup-a an goal khung belhkhawm aiin a tam zawk!

Australia-in goal khung hmasakna chance an nei a, mahse, yard 25 vela hla aṭanga Cristian Volpato-a shot chuan bar chung lam a per - goal ngat se, a pui ngawt ang! An chance neih an chhawr loh hnuah goal an chhuah zui a, a harsa sawt.

Socceroos tan Aziz Behich-a'n chawlhlawk hmain chance nei mah se, a chhawr lo a, Egypt forward Omar Marmoush-a'n ho takin a pet goal thei bik lo - minute 55-naah Australia-in si phurh an sut zui a, Aiden O'Neill-a freekick aṭanga ball kal chu Egypt defender Mohamed Hany chuan an lamah a tilut.

Egypt tan Ramy Rabia-a'n Salah-a siamsak aṭangin khungna remchang zet nei mah se, Australia keeper Patrick Beach chuan ṭha zetin a dansak a, Salah pawhin a chance neih a chhawr thei lo.

A tawpah penalty hmanga chak zawk zawn a ni a, Australia tan Harry Souttar leh Lucas Herrington ten hlahin, Egypt tana pettuten an chhuih lut vek thung a, 4-2 a hnehna changing Egypt an tlang - Argentina nen quarterfinal luh an inchuh dawn.

World Cup boruak sanga panenka hmanga penalty pettu Salah chuan, "Khatianga penalty pet tur an awm a nih chuan keimah ka nih a ngai - kan squad-ah khan tawnhriat ngah ber ka ni a, ka ṭhiannten inrintawkna an neih theih nan khatianga ka pet kha a ngai a ni," a ti - Salah hian mittui nen an chak a lawm a, World Cup round of 16 an lut thei chu a ngaihlu hle.