Canada tan Morocco an thiam hret

Inrinni zan khan FIFA World Cup round of 16 khelhah Morocco chuan 3-0 in Canada an hneh a, World Cup hnuhnung bera semifinal thleng thei team hian a aia sang thleng turin kawng dik an zawh mek. An ram chanchina inelna zawna quarterfinal an thlen vawi khatna a ni.

Morocco tan Azzedine Ounahi chuan goal hnih a khung a, substitute Soufiane Rahimi chuan goal khat a thawh ve bawk a, Canada-in a chhanletna an nei ve lo.

An inthlau lo

Inkhel ṭan hmain mi tam zawkin Morocco chak tura ringtu an tam zawk, mahse Canada-in beisei phâk bakin an khel ṭha a, a nawrtu zawkah ṭangin goal erawh an khung thei lawk lo.

Match nga aṭanga goal thum khung tawhtu Jonathan David chuan minute ngana lekah chance nei nghal mah se, a insiamrem fuh tawk loh avangin Morocco keeper Yassine Bounou-a'n a dansak. Hemi hnu lawk hian a kawppui Tani Oluwaseyi chuan mawi taka ball a virpui hnuah pet mah se Bounou a paltlang thei bik lo.

Morocco forward Ismael Saibari chu minute 22-na lekah hliam vanga lak chhuah a ngai a, Rahimi-a'n a thlak. Goal thum khung tawh Saibari nat dan hi hriat chian a la ni lo a, amah thlaktu Rahimi-a'n vawi khat shot a nei tih loh chu Morocco-in first half-ah chance hlauhawm sawi tur an nei lo.

Morocco an tho

Second half-ah Morocco-in an zia an chhuah ṭan a, ṭan aṭanga minute ngana lekah an freekick hlawhchhuah chu captain Achraf Hakimi-a'n petin, box pawna awm Ounahi tan a pe a, vengtu nei lo Ounahi-a'n ṭha zetin a pet goal a, a team hma a hruaipui.

Goal an chhuah hnuah Canada-in chance an nei ve nghal a, Tajon Buchanan-a'n pet chu Bounou-a'n a dan hnuah David chuan, freekick a pet over bawk a, Canucks-in a pawimawh ber goal an khung thei lo.

Morocco erawhin an chance neih an hmang ṭangkai chhunzawm a, minute 82-naah counter attack hmanga nawrin Real Madrid forward Brahim Diaz-a' defender a pawh khawm hnuah Ounahi tan a pe a, Girona midfielder hian chiang zetin an hmahruai belhchhahna goal a khung. Kum 26 mi Ounahi hian goal a khung hnu lawk hian Rahimi tan ṭha zetin ball a vawrh lut a, Rahimi-a'n cross bar a tauh per hlauh.

Rahimi a vanduai tluan lo a, Atlas Lions (Morocco sawina) an chak tawh mai dawna a lan laiin Canada an chesual. Goal khung tuma an nawr nasat luatah ball hlohin Diaz bawkin Rahimi tan a siamsak a, kum 30 forward hian a lungthu kim nan cool takin a khung. Canada tan thawhchhuah ngaihna a awm tawh lo a, World Cup an mangṭha a ngai.

Champion zia?

Inkhel tur lamah Morocco chu a bet zawkah an ṭang a, first half chauh thlir chuan Canada an chak a rinawm. Mahse Atlas Lions hi an khelh ṭhat loh ṭum pawhin goal hmaah an hriam a, si thum fai ngawta an chak theih avangin an tam inchhuanna tham a tling.

Canada-in vawi 10 zet pet mah se goal-ah vawi nga bak an pet thei lo a, Morocco erawh vawi nga chauh shot nei mah se vawi li lai goal zawnah a kal a, vawi thum an khung theih bawk avangin an thiam tih loh rual a ni lo.

Mahse Mohamed Ouahbi naute hi an chak avanga lawm viau hman erawh an ni lo, a chhan chu quarterfinal-ah France an hmachhawn lehnghal dawn. World Cup khelh meka squad chhah ber ang hiala ngaih Le Bleus laka chak tur chuan thi leh thau pawlha an ṭan a ngai tawh ang.