Germany-in min dawr - Klopp

Liverpool coach hlui Jurgen Klopp chuan German Football Association (DFB) in an dawr ngei thu a sawi a, German coach hian an ram team a enkawl lo ang tih a sawi theih ta loh- tun dinhmunah coach hna chelh lai a nei lo.

Germany hi World Cup round of 32 aṭangin an hneh ngei tura ngaih Paraguay chuan an pet chhuak a, coach Julian Nagelsmann-a'n a hna aṭanga a ban loh tur thu sawi mah se, Zirtawpni khan banna a theh lut a, DFB-in an lo pawm nghal.

DFB hian Klopp an be zui a, an thuchhuahah pawh zep nei loin, Liverpool boss hlui an biak thu hi an sawi. Klopp chuan, "DFB nen hian kan inbe ngei alawm. Ka rin aiin thil a thleng hma a, Julian a bang a, a thlaktu tur an zawn avangin min bia a ni," a ti.

Klopp hian 2023-24 season khan Liverpool a chhuahsan a, club enkawl a nei leh tawh lo. Red Bull hnuaiah October 2024 aṭang khan global head of soccer hna a chelh a, vawi tam coaching hna hrang hrang nen sawizawm a lo ni tawh.

Liverpool tana nomawi chawi theih ang zawng zawng chawitu Klopp chuan, "Red Bull CEO (corporate projects and investments) Oliver Mintzlaff nen kan inbe phawt ang. Ani nen pawh text chuan eng emaw chen chu kan sawi nual tawh," a ti a, a hnathawh meknate an nih avangin a ngai pawimawh - Germany erawh a enkawl ngei hmel e.