Trossard manah Arsenal leh Besiktas inrem

Turkish Super Lig club Besiktas chuan Arsenal aṭanga Leandro Trossard la kut turin Premier League champion hi inremna an neihpui tawh a, Belgian forward hi euro maktaduai 20-in an la chhuak dawn - a tirah €18mtd an pe phawt ang a, a khelh ṭhat dan a zirin €2mtd an pek belh ang.

Belgium international Trossard hian official takin Besiktas hi a la zawm lo a, a man chungchangah club pahnih an la inrem chauh tihna a ni. Mimal thilah pawh indawrna a kal mek nia sawi a ni a, kum khata €9mtd hlawh turin inbiakna a kal mek.

Trossard hian Arsenal-ah kum khat chiah contract a nei tawh a, kum 31 a tling tawh bawk. Hei vang hian Belgian forward man hi a to viau thei lo a, Gunners tan €20mtd-a hralh theih laia chhuahtir hi a fuhna zawk a awm.

Belgium tana World Cup khela fehchhuak mek Trossard hian August 2025 khan Gunners-ah hian contract thar ziakin, a hlawh tihsan sak a ni - a contract neih lai sa, kum 2027-a tawp tawh tur erawh pawhsei a ni chuang lo a, hlawh sansak tur hrim hrimin contract thar a ziak a ni ber.

Kum 31 mi forward hian season hman zawh takah khan Gunners tan hmun pawimawh changin, inelna hrang hranga match 50 a khelhah goal riat khungin, assist vawi 11 a nei tel a, Arsenal-in EPL nomawi an chawi theih nana tha thawhhlawk zinga mi a ni.

Trossard hian January 2023 khan Brighton & Hove Albion chhuahsanin, Arsenal hi £27mtd-in a zawm a, Mikel Arteta enkawlna hnuaiah hmun pawimawh a chang - Gunners tan match 174 khelin, goal 36 a khungsak a, assist vawi 34 a nei tel.

Belgian forward hi mual vei lamah a khel tam zawk a, mahse, Arsenal-ah centre forward an tlakchham changin chhawr a ni fo bawk - Besiktas hian an la ṭangkaipui thei viauin a rinawm.