Fabregas tan game hnuhnung ber?

FA Cup champion lai Chelsea chuan Nottingham Forest hnehin fourth round an lut a, Inrinni zan inkhel hi midfielder Cesc Fabregas tan chuan Blues jersey ha chunga a match hnuhnung ber ni tura ngaih a ni.

Stamford Bridge-ah Fabregas hian Ruben Loftus-Cheek-a penalty hlawhchhuah a hlah, mahse striker Alvaro Morata goal hnih hmangin Maurizio Sarri naute hian 2-0 in hnehna an chang tho.

Spain international hi Nottingham Forest lakah captain armband hrentir a ni a, minute 85-naah thlak niin mittui tla chungin khelmual a chhuahsan a, English football-a match 501 kheltu hi entu mipui lamin zahna lantir nan ding chungin an thlah.

Kum 31 mi Fabregas hi French Ligue 1 club AS Monaco nen an inhnaih hle nia sawi a ni a, Arsenal tana a khelhpui tawh Thierry Henry enkawlna hnuaiah chona thar a hmachhawn ang.

Ram tana World Cup leh Euro C'ship chawi tawh Fabregas chuan, "Professional football ka khelhna kha nimin mai emaw tih tur a ni a, mahse kum 15 ngawt a lo ni ta. Tun ṭuma ka hun tawn hi ka beisei phak loh niin, ka chunga ṭhatna an chhuah dan hi ka hre reng ang," a ti. Chelsea fans bakah Arsenal fans ṭhenkhatin a inkhel hi a hmunah an en a ni.

Gunners midfielder hlui chuan sawizawmin, "Tuna player rawn chhuak tharte hnena ka chah duh chu, in hun hman second tin kha hlim leh nuamti takin hmang rawh u, kan hriat loh karin hun hi a kal chak hle a ni," tiin a sawi.

Fabregas chungchang an zawhna chhangin assistant coach Carlo Cudicini chuan, "Cesc hma hun hi sawi chian theih ka nei lo, a hun hnuhnung a nih chuan boruak awm dan hi atan duhthusam a ni ang," a ti a, an player chu hmathlir nei ṭha leh midang tana entawn tlak a nih thu a sawi bawk.