Penalty pettu Guimaraes maw!

Brazil tana penalty pet tura Bruno Guimaraes a rawn chhuah khan Vinicius Junior-a'n a kian lo a, Newcastle United midfielder kha pet tur hrim hrim a ni. Carlo Ancelotti-a'n uluk takin an zir chiang a, a tawpah erawh an chhut nasa mah mah a, an chhutsual!

Norway an hneh loh zawhah Carlo Ancelotti chuan penalty pet tur mi panga an puang a, Vini Jr a tel lo. Italian coach-in a zirchianna aṭangin thutlukna a siam a, penalty pet dan tur indawt chu Neymar, Igor Thiago, Raphinha, Bruno Guimaraes leh Gabriel Martinelli te an ni.

Pet tura dah hmasa pathum ten inkhel bul an ṭan loh avangin palina Bruno Guimaraes-a'n a pet a, a pet goal lo. Brazilian player-in kum 1986 hnua hun pangngai emaw extra time emaw china penalty an hlah hmasa ber a ni. Kum 40 liam ta khan quarterfinal-a Brazil leh France inkhelh ṭumin Zico penalty pet chu goalkeeper-in a dang.

Transfermarkt website aṭanga a lan dan chuan Bruno Guimaraes hian World Cup hmain penalty vawi thum chiah a pet. Premier League-ah vawi hnih Newcastle United tan petin Ligue 1-ah Lyon tan vawi khat a pet a, a pet goal vek.

Penalty pet thiam panga zinga lang pha lo Vini Jr-a'n vawi 13 penalty a pet goal a, goal a khungna hi La Liga bakah Champions League te a ni hlawm. Mahse, Vini Jr hian penalty vawi ruk a hlah a, Ancelotti hian chhan neiin thutlukna a siam tih a hriat theih.