India ramah Anderson a champion

Maharashtra Open khelh zawh takah seeded pakhatna Kevin Anderson chuan Ivo Karlovic hnehin nomawi a chawi a, nikum final-a a tlawm tawhna hmunah ropuina a chang let ta chiah a ni.

Anderson leh Karlovic te an inkhel tawk hle a, India rama tennis inelna ngaihhlut final bikah hian aces vawi 55 zet hmuh tur a awm hnuah 7-6 (7-4), 6-7 (2-7), 7-6 (7-5) in Anderson a chak zawk.

Kum 32 mi Anderson hian aces vawi 36 ngawt a vaw chhuak thei a, kum 39 mi Karlovic a hneh theihna chhan langsar chu a service neih ṭhat vangah a ngaih theih. Kum 1977 khan Ken Rosewall chuan kum 43 mi niin ATP Tour final a khel tawh a, ani hnuah Karlovic hi ATP hnuaia inelna huanga final lut leh thei upa ber a ni.

Maharashtra Open mipa doubles huangah tualchhung tlangval pahnih Rohan Bopanna leh Divij Sharan te ṭangdun chuan British pair Bambridge leh O'Maara te lakah 6-3, 6-4 a hnehna changin an champion.

Bopanna tan ATP Tour title 18-na a nih chiah laiin a ṭanpui Sharan tan erawh India rama a nomawi lian hmasa a ni thung. India tlangval pahnih hian nikuma Asian Games gold medal an lak hnua hlawhtlinna an chan lehna hmasa ber a ni a, January 14 aṭanga khelh tur Australian Open-ah beiseina an neih san phah ang.