Balogun an hrem leh lo!

USA striker Folarin Balogun chu red card hmu mah se, USA president Donald Trump a inrawlh hnuah a red card chu 'suspend' a ni a, FIFA thuchhuahah chuan eng vanga red card hi 'suspend' nge a nih, engmah tarlan a awm lo thung!

Kum 25 mi striker hi round of 32-a Bosnia-Herzegovina nen an inkhelh khan defender Tarik Muharemovic lakah hlauhawm takin a che a, red card pek a ni - dan ang chuan a match leh chu khel thei lo tur a ni.

Mahse, FIFA chuan nimin khan Balogun-a red card chu kum khat atan suspend a nih thu an puang a, chumi awmzia chu kumin chhung atan hrem a nihna hi a nung ang a, kum khat chhung hian a tihsual ang a tisual nawn a nih loh chuan hrem a ni dawn lo, tihna a ni.

FIFA hian red card suspend chhan hi engmah an sawi lo a, FIFA dana, article 27-a suspend tura thuneihna an neih dan chauh an tarlang. Hetihlai hian US president Donald Trump chuan social media kaltlangin FIFA hnenah lawmthu a sawi!

Trump chuan, "FIFA-in thutlukna dik siam a, dik lo taka hremna tawk dinhmun an hrethiam hian min tilawm hle," a ti a, khawthlang media-ten an tarlan dan chuan Trump hian FIFA president Gianni Infantino a bia a, hetiang hian thutlukna hi siam a ni ta a ni.

Hetihlai hian Royal Belgian Football Association (RBFA) chuan FIFA thutlukna chuan a barakhaih thu sawiin, game zahawmna leh dan duante zawm an nih theih nan hma an lak tur thu an puang ve nghal.

Europe-a football thuneitu sang ber UEFA pawhin FIFA chet dan chu na takin an dem a, "Sawifiah ngaihna awm lo thutlukna siam a ni hian min barakhaih hle," an ti.

USA leh Belgium hi tukin zing dar 5:30-ah World Cup round of 32 khelin an inhmachhawn a, he thuziak i chhiar meuh chuan result a hriat tawh hial ang.