Djokovic tan Grand Slam quarterfinal vawi 66

Grand Slam champion tam ber hi tennis player ropui bera chhal tur chu ni se Novak Djokovic hi khawvel player ropui ber a ni ang. Kum 39 mi Djokovic hian Grand Slam nomawi vawi 24 a chawi a, amah aia mi ṭhahnem takin an dah sang Roger Federer (20) leh Rafael Nadal (22) te aiin a champion tam zawk.

Player ropui pahnih Federer leh Nadal te an chawl tawh a, Djokovic erawh a la chawl lo a, kumin Wimbledon-ah la telin seeded no. 7 a la ni pha a, a vawi 66 nan Grand Slam inelnaah quarterfinal a lut bawk.

July 5, Pathianni khan Djokovic hian Roman Safiullin chu 7-6 (8-6), 6-3, 3-6, 6-3 in a hneh a, vawiin hian seeded no. 3 Felix Auger Aliassime a hmachhawn dawn. Serbian tennis star hmabak a harsa dawn hle.

Wimbledon inelnaah seeded no. 1 Jannik Sinner pawh a la dam a, Italian player hian vawiin hian Jan-Lennard Struff a hmachhawn ang. Djokovic hi Wimbledon-ah vawi sarih a champion tawh a, tun ṭuma champion rinkai ber leh champion lai Sinner hi vawi khat chiah a la champion thung.