Switzerland hmaa ding tur Colombia

Kumin World Cup-a beisei phâk baka khel ṭha pahnih Switzerland leh Colombia te chu zanin dar 1:30-ah an inhmachhawn dawn a, group stage-a hmahruaitu ni thei ve ve an nih bakah hmuhnawm taka khel ṭhin an nih avangin men rei a sual dawn lo.

Hello Switzerland

An match hmasa berah Switzerland hian Qatar an inhnehtawkpui avangin an lakah beisei a sang lo a, mahse an hmabak match-ah hnehna an chang vek a, group B-ah a thlengtu Canada chungah an awm thei. Round of 32-ah Africa ram lian Algeria chu harsa lutuk loin 2-0 in an hneh bawk a, an phur vanglai tak a ni.

Murat Yakin naute zingah Michel Aebischer leh Luca Jaquez te dinhmun a chiang lo a, Colombia lakah an inlan thei a nih pawhin bench-ah an ṭhut a rinawm zawk. Midang erawh an dam kim thung.

Switzerland tan an captain Granit Xhaka chu an khaipa ber a ni leh dawn a, Sunderland midfielder hi quarterfinal an thlen dawn chuan a chet ṭhat a ngai. Xhaka hmaah hian Johan Manzambi-a'n bul a ṭan leh a rinawm a, kum 20 mi midfielder hian goal thum khungin assist pahnih a nei tawh a, Newcastle United-in an dawr mek.

Tlarhma lamah Breel Embolo an nei a, Embolo bakah hian Nottingham Forest forward Dan Ndoye leh Leeds United striker, Noah Okafor te an nei a, goal khung kawngah lungngaihna tur a awm lo

Red Crosses (Switzerland sawina) hian Gregor Kobel, Manuel Akanji, Ricardo Rodriguez, Djibril Sow, Ruben Vargas leh Dennis Zakaria te an la nei cheu a, mimala hming lian bakah Europe club langsar tan an khelh theih avangin Colombia lakah an zam dawn lo.

Colombia an ṭha

Nestor Lorenzo-a kaihhruai Colombia hian World Cup an hmang ṭha hle a, tlawm la nei miah loin group stage-ah Cristiano Ronaldo telna Portugal chungah awmin pakhatna an ni a, rounf of 16 thlengin goal khat bak an la chhuah lo.

Round of 32-ah Ghana an hmachhawn zui a, Jhon Arias-a goal hmangin 1-0 in hnehna an chang. Colombia hian goal khat chiah khung mah se inkhel an thunun tluan zak. Black Stars (Ghana) hi group stage-a England lo chelh tawhtu an nih avangin Colombia tan inrintawkna petu tur a ni.

Colombia tan an striker Jhon Cordoba chu a khel na vangin an chhawr thei dawn lo a, Cordoba hi Ghana lakah khan inkhel ṭan aṭanga rei loteah an thlak nghal. Mahse amah thlaktu Luis Suarez a che ṭha nghal a, zaninah pawh bul a ṭan rin a ni.

'El tri' tan Bayern Munich forward Luiz Diaz-a hoin 2014 World Cup hnua a vawi khat nan, quarterfinal luh leh an tum dawn a, Golden Boot lo dawng tawh James Rodriguez bakah Crystal Palace full back Daniel Munoz te an la nei avangin a sang thei ang ber thlen an tum dawn

Engtin zel?

Ram pahnihte hi vawi li an lo inhmachhawn tawh a, Colombia vawi khat chakin vawi khat an inhnehtawk. Mahse an intawn hnuhnung ber hi 2007 daih tawh kha a ni a, an chanchin hlui hi an pahnih inkar sawifiahna atan hman chi a ni tawh lo.

Quarterfinal aia sang la thleng lo ve ve an ni a, an squad chhah dan leh an tun hnaia an khelh dan thlirin an thlen chuin aia sang thleng turin tun aia hun ṭha hi a awm bik lo. Mahse an hmabaka a ko dawn a, quarterfinal-ah champion lai Argentina leh Mohamed Salah telna Egypt nen an intum thei dawn.