British GP-ah Leclerc leh Ferrari an chungnung

Mi tam takin F1 inelnaa langsar ber zinga an ngaih British Grand Prix chu Pathianni zan khan neih a ni a, Ferrari driver Charles Leclerc chuan hnehna a chang. Leclerc dawt chiahah George Russell a thleng a, Leclerc-a teammate Lewis Hamilton chu pathumnaah a thleng bawk a, podium-ah Ferrari driver pahnih an lawn avangin an tan lawmna tur a ni.

Silverstone Circuit-a intlansiakah Leclerc-a'n bul a ṭan ṭha a, hun tam zawkah hmahruaitu a ni. Mercedes driver Andrea Kimi Antonelli chuan a hmahruaina chhuhsak ve zeuh mah se, Leclerc a inthlahdah lo a, pakhatna nih phuin a tlan.

Kum 99 mi Leclerc chuan,"A ropui ka ti hle, rim taka thawhrah a lang chhuak a ni. Hun harsa karah pawh mi chhel chu an ding chang reng ṭhin. Ka lo suangtuah lawk ang ngei khan a tawp ta lo a ni mai thei, mahse tun kar liam ta harsa tak tak te hnua hetianga hnehna chan leh hi chu thil ropui tak a ni," a ti.

Italian driver Antonelli erawh a car hma lam a chhiat avangin 15-na daih a ni a ni zui. Antonelli-a'n beisei pha lo mah se a teammate Russell a che chhe lo a, pahnihnaah thlengin tun season-ah vawi nga podium a lawnna a ni a, Mercedes chhuahsan mai tur ang hiala an sawi Russell hi an ramah pakhatna ni zo lo mah se a tlan ṭha thawkhat.

British driver Russell a hnungah Hamilton a awm bawk a, kum 40 mi Hamilton pawh hi podium vawi nga a lawnna chiah a ni a. Ferrari a zawm hnuah a season ṭha ber hmangin, Barcelona-Catalunya GP-ah khan Ferrari hnuaia a vawi khat nan pakhatna a ni tawh bawk.

Hetihlai hian lap 48-naah Max Verstappen chu a car-ah buaina a awm avangin a chesual a, a tlan chhunzawm theih loh avangin position a nei lo. World champion vawi li lo ni tawh hian Hamilton chu pahnihna ni turin a um phâk ṭep a, mahse kawng kualah chesual palh.

He chetsualna leh kar hmasa lama Austrian Grand Prix qualifying-a a chetsualna te hi kawng kualah thleng tura straight-line mode a inthlak kual khan, Car rear wing a inkhar fel tawk loh vang a ni.

Dan thar a duh loh avanga chanchin ngah tak Verstappen a lungawi lo a, Belgian driver chuan, "A hlauhawm takzet, vawi hnih ngawt inhliam thei a ni. Austria-ah khan ka vannei a, helai hmunah pawh hian ka vannei leh. He thil thleng hian rilru a tikal thui takzet," tiin a sawi.

Kum 28 mi Verstappen hi tun season-ah vawi hnih podium lawn tawh mah se, pakhatna a la ni lo. July 19 hian Belgian GP tlan leh a ni dawn a, an ram ngeiah Verstappen hian hnehna chan a duh dawn avangin indawm kun hman a ni lo.