Sabalenka vaw tlatu Osaka

Japanese player Naomi Osaka chuan Pathianni zan khan 6-2, 7-6 in world no. 1 leh hmeichhe tennis-a ball vuak nat vanga mi hriat hlawh, Aryna Sabalenka a hneh a, quarterfinals a lut.

Osaka hian Sabalenka lakah a khel ṭha takzet a, a hlap a nat theih em avangin Sabalenka a buai zawk hial. Sabalenka hi 2020 US Open hnua set la loa a tlawm lehna hmasa ber a ni. Belarus player chuan,"Ka khelh danah ka lawm lo hle. Mahse Osaka a khel ṭha a, chak phu khawpin a khel chhuak," a ti.

Kum 28 mi Osaka chuan, "Hetiang khawpa hlim leh nuam tia taka ka khelh lohna hi a rei tawh hle, chuvangin hetia ka khel thei leh hi ka tan a hlu takzet, kan inkhelh hma hian Sabalenka lakah hian vawi thum zet ka lo tlawm tawh a, thil thlen dan kha thlak danglam ka duh a, chu mi atana hun remchang ka nei leh thei kha ka lawm bawk," a ti

Kum 28 mi Osaka hian Grand Slam title vawi li a la tawh a, mahse a lak hnuhnun ber chu kum 2021, Australia-ah a ni. Mahse, kum 2023 July thlaa a fa, Shai, a hrin hnu hian mi ṭhenkhat chuan a hma angin a chet ṭhat an ring tawh lo hman a, mahse Osaka hian amah ringhleltute ka a hupsak.