Reading ngamtu United-in VAR chhawr ṭangkai

FA Cup third round-ah Manchester United khel ṭha lo mah se an mikhual Reading chu 2-0 in an ngam a, manager lailawk Ole Gunnar Solskjaer enkawlna hnuai match nga an khelhah an la chak vek!

Manchester United tan Juan Mata chuan minute 22-na lekah penalty hmangin goal hmahruai a khung a, hei hi video assistant referee hmanga enfiah a nih hnua pek a ni.

Romelu Lukaku chuan first half hun pek belhah an goal hnihna a khung ve leh a, second half-ah goal dang lut tawh loin United hi 2-0 in an chak a, fourth round an lut. 

Minute 20-naah referee Stuart Attwell chuan video assistant referee a rawn a, hetah tak hian VAR a rawn chhanah tumah an chiang lo. 

Attwell-a'n VAR a en hma chiah hian Alexis Sanchez chuan Fred tan ball a siamsak a, Fred hian a awma la thlain Mata a pe - Spanish midfielder hian Fred pe lehin Brazilian midfielder hian goal-ah a chantir. 

Mahse, United-in goal an khung hma hian Fred hi a offside ngei niin a lang a, assistant referee chuan a phar. Mahse, Attwell-a'n a ham lo a, a hnu lawkah VAR a rawn.

Attwell-a VAR rawn chhan erawh Reading defender Omar Richards-a'n Mata a tih tluk vang a ni tih a lang zui a, minute thum inkhel tih khawtlai a nih hnuah penalty pek a ni. 

Old Trafford-ah penalty pet turin Juan Mata a rawn pen chhuak a, Spanish midfielder hian goal-a chantir turin harsatna a tawk lo.

Mata chuan, "Penalty dik tak a ni a, referee khan hun a hmang rei hret tih erawh ka pawm a, nakin zelah chuan kha aia rang zawk khan VAR an hman ka beisei," a ti. 

United boss Solskjaer chuan, "Penalty chiang tak a ni a, penalty a nihzia sawi turin keichuan VAR ka mamawh kher lo ang," tiin a sawi ve bawk. 

Red Devils tan hun pek belh minute linaah Romelu Lukaku chuan goal a khung ve leh a, Reading tan Old Trafford-a si hnih phurh sut zawh ngaihna a awm lo. 

Hmabak chu United hian January 13 zanah Tottenham Hotspur an lenchilh dawn a, inkhelh hma hian Solskjaer chuan, "Player-te tan Spurs hmachhawn tura an ṭhat tawkzia pholanna remchang a ni," a ti. 

Norwegian manager hian player pakua ngawt a thlak danglam zui a, Reading laka an khelh dan en chuan Spurs lakah player a siksawi leh nual ngeiin a rinawm.

United legend chuan, "Khel ṭha tak kan ni hran lo. Mahse, player pakua ngawt ka siksawi a, an khelh ho tam tawk loh avangin an buai deuh a nih pawhin a awm tho a ni. A pawimawh ber erawh goal kan khung a, kan tlang kha a ni," a ti.

Manchester khaw club tan kum 19 mi, United academy chhuak Tahith Chong chu minute 62-naah bench aṭanga luhtir a ni a, Dutch forward hi a khel ṭha hle - United fan-ten hmuh nuam an ti khawp ang.