Thlak danglam leh chiah ula - Belgium

Belgium-in USA nen an inkhelh hmain US striker chhuanvawr Folarin Balogun inlan theih leh tur thu an hria a, a lungawi thlak loh - Balogun hi Bosnia-Herzegovina defender Tarik Muharemovic laka a foul vanga red card hmu a ni a, dan ang chuan Belgium hmachhawn thei lo tur a ni.

Mahse, team pahnih intawn hmain Belgium fan-te thu lawmawm lo hriat an nei a, USA president Donald Trump-a'n FIFA president Gianni Infantino biain, an striker hremna chungchang hi a sawipui.

FIFA President hian an lo en nawn tur thu hrilhin, Balogun-a 'red card' chu suspend a ni a, Trump-a lahin intithei takin FIFA President nena an inbiak thu a sawi - FIFA thutluknain khawvel a barakhaih a, lungawi lo an tam hle.

Royal Belgian Football Association (RBFA) chuan FIFA hi na taka demin, an lungawi lohna an thlen a, mahse, FIFA lam chuan, "He buainaah hian Belgium an tel ve lo," an ti hmak!

FIFA chuan Balogun-a foul-na hi Bosnia-Herzegovina lakah a ni a, Belgium inrawlh vena tur awm loah an ngai. Mahse, World Cup-a USA lo hmuaktu chu Belgium an ni a, Balogun hremna hlip hi Bosnia aia tuar thei zawk an ni.

Liverpool coach hlui, Germany coach thar tur anga sawi Jurgen Klopp chuan, "Football hi kan game a ni a, anni ta a ni lo. Mi pahnih, football chungchang engmah hre loin hetianga ngaihdan an lo siam ve mai hi a thiang lo.

"Red card a ni a, sawi bo theih dan a awm lo. Balogun khan a tum reng vangin a tlawh lo a, mahse, danah chuan red card a ni tho," a ti a, na takin Trump-a leh Infantino a khak.

England boss Thomas Tuchel pawhin zawhna zawtin, "Anih chuan red card apiang an ngaihtuah ṭha zel dawn tihna em ni?" a ti a, UEFA pawhin thuchhuah siamin, "Ngaihthiam theih loh thutlukna," an ti.

Niminah Balogun a inlan ta ngei a, mahse, a khel ṭha lo! Team intiat tawk tak inkhel anga ngaihah USA an mualpho a, Belgium chuan 4-1 ngawtin an sawp - Belgian player-te chuan thil thlengin a tihphur avanga an khelh ṭhat thu an sawi.

A tawi zawnga sawi chuan, US player-ten malsawmnaa an ngaih kha an tan anchhia a chang ta zawk a ni ber. Belgium captain Youri Tielemans chuan, "Khelmualah kan chhanglet tur a ni, tiin kan infuih a, kan sawi ang ngeiin kan ti ta a ni," a ti!

Belgium national team chuan striker Romelu Lukaku-a goal khung lawm lai thlalak pho chhuakin, "Thlak danglam leh chiah ula" tiin a caption an ziak a, FIFA an tihel tih a chiang.

Hetihlai hian Belgium head coach Rudi Garcia chuan inkhelh zawhah Balogun-a'n an lam a pan thu sawiin, "Kan hnenah lo kalin, eng eng emaw a rawn sawi a, a lawmawm ka ti hle. A thiam loh a awm lo a, amah kan dem loh thu ka lo hrilh," a ti.

Garcia chuan sawi zawmin, "US starting line-up chu eng pawh ni se, a pawimawh ber chu kan game plan a ni. Ka naute an puitling takzet a, keimahni kan pawimawh ber thu ka hrilh," a ti a, Balogun-a boruakin a tihbuai loh thu a sawi.

A tawpah chuan Belgium an chak a, an chak a ni mai lo a, goal li an khung. USA an mulpho a, Balogun-a boruak avangin football fans tam zawkin US mualphona hi an lawm - a awm lo hran lo e, football-in hnehna a chang tlat alawm.